لاہور( این این آئی) وزیر اعظم عمران خان سے وفاقی وزیر ریلوے شیخ رشید احمد نے ایوان وزیر اعلیٰ میں ملاقات کر کے نئی ٹرینوں کے اجراء اور خصوصاً اپنے دورہ ایران سے متعلق بریفنگ دی۔شیخ رشید احمد نے وزیر اعظم عمران خان کو وی وی آئی پی ٹرینوں جناح ایکسپریس اور سرسید احمد خان ایکسپریس کے افتتاح کے حوالے سے تیاریوں اور کرایوں کے حوالے سے آگاہی دی ۔

وزیر ریلوے شیخ رشید نے وزیر اعظم عمران خان کو ایران کے حالیہ دورے اور ایرانی قیادت سے ہونے والی ملاقاتوں کے حوالے سے بھی تفصیلی آگاہ کیا ۔بعد ازاں میڈیا سے گفتگو کرتے ہوئے شیخ رشید نے کہا کہ وزیر اعظم عمران خان کو ایرانی قیادت سے ہونے والی ملاقاتوں کے حوالے سے تفصیلی آگاہ کیا ہے اور امید ہے کہ کسی بھی لمحے ایران کے صدر وزیر اعظم عمران خان سے ٹیلیفونک رابطہ کریں ۔ ہم ریلوے میں ایران اور ترکی کے ساتھ نیا سلسلہ شروع کرنے جارہے ہیں اور دونوں ملک ہمارے ساتھ چلنے کو تیار ہیں ۔ انہوں نے کہا کہ ہو سکتا ہے کہ افغانستان میں آئندہ کچھ ماہ میں عبوری حکومت کا قیام عمل میں آجائے جس کے بعد قندھار ، تفتان، کوئٹہ اور گودار اہم روٹس ہوں گے اور تاریخ میں ریلوے کا سنہری دور شروع ہونے جارہا ہے ۔ انہوں نے بتایا کہ وزیر اعظم عمران خان 30مارچ کو لاہور سے پہلی وی وی آئی ٹرین جناح ایکسپریس کا افتتاح کریں گے ۔ میں اس کا کرایہ 10ہزار روپے رکھنا چاہتا تھا لیکن وزیر اعظم عمران خان نے کہا ہے کہ اسے 7ہزار رکھا جائے ۔ سرسید احمد کا کرایہ 10ہزار روپے ہو گا لیکن اس کا افتتاح بعد میں ہوگا ۔ انہوں نے بلاول بھٹو کی نواز شریف سے جیل میں ملاقات کی درخواست کے حوالے سے کہا کہ عمران خان کو اب ان لوگوں سے کوئی خطرہ نہیں۔

یہ چلے ہوئے کارتوس ہیں اور کچھ نہیں بگاڑ سکتے ۔حکومت نے نواز شریف کو علاج معالجے کی ہر طرح کی سہولیات فراہم کی ہیں لیکن وہ جہاں علاج کرانا چاہتے ہیں سب کو اس کا اچھی طرح علم ہے ۔ آصف زرداری اور نواز شریف کو اب اپنی صحت پر توجہ دینی چاہیے کیونکہ جان ہے تو جہان ہے ۔