سرگودھا (این این آئی) سرگودھا کی باہمت بیوہ خاتون نے 4 بیوہ خواتین کیساتھ مل کر اپنا ہوٹل قائم کرلیا۔ تفصیلات کے مطابق سرگودھا کے علاقہ غلہ منڈی میں 48سالہ باہمت بیوہ کوثر بی بی نے دیگر4 خواتین کیساتھ مل کراپنی مدد آپ کے تحت کرائے کی دکان میں ہوٹل قائم کرلیا۔کوثر بی بی سمیت چاروں ہوٹل چلانے والی خواتین کے شوہر وفات پا چکے ہیں، ان خواتین نے ہمت ہارنے کی بجائے اپنا اور بچوں کا پیٹ پالنے کیلئے خواتین کا
ہوٹل قائم کیا جو علاقے کا معروف ہوٹل بن چکا ہے ۔خواتین کے ہوٹل پر کھانے کھانے کیلئے آنیوالے گاہکوں کا کہنا ہے کہ با ہمت عورتوں نے ایک ایسا ہوٹل قائم کردیا ہے جہاں پر کھانا انتہائی لذیذ،مزیدار اور سستا ہوتا ہے۔کوثر بی بی نے کہا کہ ہمت اور ارادے مضبوط ہوں تو انسان مشکلات کے باوجود تمام تر مسائل آسانی سے حل کر سکتا ہے۔انہوں نے کہا کہ اگر حکومت مدد کرے تو وہ مزید خواتین کو روزگار فراہم کر سکتی ہے۔
