اسلام آباد (این این آئی)پاکستان نے بار پھر کہا ہے کہ خطے میں امن و استحکام کے لئے افغان مفاہمتی عمل میں سہولت کاری کے حوالے سے پاکستان اپنی کاوشیں جاری رکھے گا ۔ جمعہ کو امریکی نمائندہ خصوصی برائے افغان مفاہمتی عمل زلمے خلیل زاد وزارتِ خارجہ پہنچے اور وزیر خارجہ مخدوم شاہ محمود قریشی سے ملاقات کی ۔زلمے خلیل زاد کے ہمراہ وفد میں امریکی اسٹیٹ ڈپارٹمنٹ، دفاع اینڈ نیشنل سیکیورٹی کونسل کے نمائندے شامل تھے ۔دوران ملاقات افغان مفاہمتی عمل پر ہونے والی پیش رفت پر تبادلہ خیال کیا گیا ۔ اس موقع پر
مخدوم شاہ محمود قریشی نے کہاکہ خطے میں امن و استحکام کے لئے افغان مفاہمتی عمل میں سہولت کاری کے حوالے سے پاکستان اپنی کاوشیں جاری رکھے گا ۔مخدوم شاہ محمود قریشی نے کہا کہ افغانستان میں قیام امن کے لیے مفاہمتی عمل مشترکہ ذمہ داری ہے ۔زلمے خلیل زاد نے امریکہ اور طالبان کے درمیان براہ راست مذاکرات کے انعقاد میں سہولت کاری پر وزیر خارجہ مخدوم شاہ محمود قریشی کا شکریہ ادا کیا او ر کہاکہ امریکی قیادت، افغانستان میں قیام امن کے حوالے سے پاکستان کی کاوشوں کو قدر کی نگاہ سے دیکھتی ہے ۔
