کراچی(نیوز ڈیسک)قومی ایئرلائن پی آئی اے کا مالی بحران انتہائی سنگین ہوگیا،فضائی میزبانوں کو 10 ماہ سے انٹرنیشنل الائونس نہیں ملاہے۔ذرائع کے مطابق پی آئی اے میں مالی بحران انتہائی سنگین صورتحال اختیار کرگیا ہے جس کے باعث فضائی میزبانوں کو 10 ماہ سے انٹرنیشنل الائونس نہیں ملے، الائونس نہ ملنے سے فضائی میزبانوں کے لیے روزمرہ کے اخراجات پورے کرنا مشکل ہوگیا ہے، پی آئی اے اپنے فضائی میزبانوں کو بین الاقوامی روٹس پر4 ڈالر

فی گھنٹہ انٹرنیشنل الائونس ادا کرتا ہے اور فضائی میزبان اسی الائونس سے بیرون ممالک اپنے اخراجات پورے کرتے ہیں۔مالی مشکلات کے شکار فضائی میزبان بچوں کی فیسیں تک ادا نہ کر سکے ان کے لیے روزمرہ کے معاملات چلانا بھی مشکل ہوگیاہے جب اس سلسلے میں پی آئی اے کے ترجمان سے بات کی گئی تو انہوں نے بتایاکہ کچھ مالی مسائل تھے جن کی وجہ سے انٹرنیشنل الائونس ملنے میں تاخیر ہوئی ایک دو روز میں الائونس کی تمام رقم ملنا شروع ہو جائے گی۔