اسلام آباد(آئی این پی )پاکستان الیکٹرانک میڈیا ریگولیٹری اتھارٹی (پیمرا)نے” نیو ٹی وی” پر نشر ہونے والے اوریا مقبول جان کے پروگرام “حرفِ راز”پر پیمرا (ترمیمی) ایکٹ 2007 اور 2018کی سیکشن 20، پیمرا رولز2009کی شق15(1)، پیمرا الیکٹرانک میڈیا(پروگرام و اشتہارات)
ضابطہ اخلاق 2015 ء ، دستورِ پاکستان کے آرٹیکل 5، انسدادِ دہشتگردی ایکٹ 1997کی سیکشن 11-W اور بلوچستان ہائیکورٹ رٹ پٹیشن نمبر 227/2013مؤرخہ 2فروری 2013 ء کے احکامات کی خلاف ورزی کرنے پر 30دن کیلئے پابندی عائدکر دی ہے۔ اس پابندی کا اطلاق یکم جنوری تا 30جنوری 2019 ء تک ہو گا۔یہ پابندی نیو ٹی وی کے مؤرخہ 4دسمبر2018 ء کو رات گیارہ بج کر 5منٹ پر نشر ہونے والے پروگرام “حرفِ راز” میں میزبان اوریامقبول جان اور جمیل فاروقی کے لائیو کال پر تحریکِ طالبان افغانستان کے ترجمان کے گورنمنٹ آف پاکستان کی فارن پالیسی اور نیشنل سکیورٹی معاملات کے حوالے سے لئے گئے انٹرویو پر مؤرخہ 7دسمبر2018 ء کو بھیجے گئے اظہارِ وجوہ کے نوٹس اور مذکورہ پروگرام مؤرخہ 11اور 12دسمبر 2018 ء میں اوریا مقبول جان کی طرف سے “پشتون” قوم کے خلاف توہین آمیز ریمارکس نشر کرنے پر 12دسمبر 2018 ء کو بھیجے گئے کے اظہارِوجوہ کے نوٹس کی روشنی میں عائد کی گئی ہے ۔ اتھارٹی کے احکامات کی خلاف ورزی کی صورت میں چینل کے خلاف مزید قانونی کاروائی عمل میں لائی جاسکتی ہے جس کے تحت چینل کا لائسنس معطل یا منسوخ کیا جا سکتا ہے۔
