پشاور ( آئی این پی) واٹر اینڈ سینٹیشن سروسز کمپنی کے ترجمان راحت اللہ نے سوشل میڈیا پر اوربعض اخبارات میں شائع ہونے والی خبروں کو من گھڑت قراردیتے ہوئے کہاہے کہ کمپنی کا پیسکو کے ساتھ کوئی معاہدہ نہیں ہوا ہے اور نہ ہی بجلی کے بلوں میں عوام سے صفائی کے نام پر چارجز وصول کئے جائیں گے۔ جمعرات کو یہاں جاری کردہ ایک بیان میں کمپنی کے ترجمان نے کہاہے کہ بعض عناصر کمپنی کو بدنا م کرنے کی
سازشیں کررہے ہیں لیکن وہ عناصر اپنے مذموم مقاصد میں کامیاب نہیں ہونگے۔انہوں نے کہاہے کہ شہر کے چودہ یونین کونسلوں میں صفائی،صاف پانی اور نکاسی آب کی بہتر فراہمی کے لئے گھر گھر سروے جاری ہے جس کا مقصدشہریوں کو بہتر خدمات فراہم کرنا ہے۔انہوں نے کہاکہ کمپنی کے خلاف سوشل میڈیا اوربعض اخبارات کے ذریعے جو منفی پروپیگنڈا کیا جا رہا ہے انکے خلاف کمپنی قانونی چارہ جوئی کرئے گی۔
