اسلام آباد(این این آئی) چین کی کمیونسٹ پارٹی کے وفد نے پاکستان مسلم لیگ (ن)کے رہنماؤں سے گزشتہ روزاسلام آباد میں ملاقات کی اور پاکستان اور چین کے درمیان پارلیمانی، سیاسی اور عوامی سطح پر رابطوں کو مزید فروغ دینے پر اتفاق کیا ہے۔ چین کی کمیونسٹ پارٹی کے وفد کی قیادت سونگ تاکررہے تھے جبکہ مسلم لیگ (ن) کی جانب سے ارکان پارلیمان احسن اقبال، بیگم نزہت صادق، مرتضی جاوید عباسی اور مریم اورنگزیب اجلاس میں شرکت کی۔

اس موقع پر پاکستان میں چین کے سفیریاجنگ بھی موجود تھے۔احسن اقبال نے کہاکہ پاک چین دوستی ہمالیہ سے بلند، سمندر سے گہری اور شہد سے میٹھی ہے۔ ستاروں سے بلند یہ دوستی اب آئرن برادرز کے مضبوط رشتے میں تبدیل ہوچکی ہے۔ انہوں نے کہاکہ سی پیک نہ صرف دونوں ممالک بلکہ خطے کی تقدیر بدلنے کا عظیم منصوبہ ہے جو محمدنوازشریف کی وزارت عظمی میں تعبیر کے مراحل طے کرتے ہوئے آج دونوں ممالک کی بے مثال دوستی کی روشن مثال بن چکا ہے۔ سی پیک کے نتیجے میں پاکستان میں توانائی کے بحران کے خاتمے میں بڑی مدد ملی اور گیارہ ہزار سے زائد میگاواٹ ریکارڈ بجلی کی پیدوار کا ہدف ممکن ہوا۔ احسن اقبال نے کہاکہ چین اور پاکستان دونوں بااعتماد رشتے میں منسلک ہیں جس کا اندازہ اس امر سے لگایا جاسکتا ہے کہ دونوں ایک دوسرے کے اقدامات کو اعتماد کی نظر سے دیکھتے ہیں اور ایک دوسرے کے لئے ہمیشہ درست خیال کرتے ہیں۔مسلم لیگ(ن) کے رہنماں نے چینی وفد کو یقین دلایا کہ نوازشریف اور شہبازشریف کی قیادت میں حزب اختلاف میں رہتے ہوئے دیگر جماعتوں کے ساتھ مل کر سی پیک اور پاک چین دوستی کے مقصد کو اسی جذبے، وابستگی اور توجہ کے ساتھ آگے بڑھائیں گے جس کامظاہرہ ہم نے اپنے دور اقتدار میں کیاتھا کیونکہ یہ منصوبہ پاکستان اور اس کے عوام کے روشن مستقبل کے لئے کلیدی اہمیت رکھتا ہے ۔ چینی وفد کے سربراہ سونگ تانے مسلم لیگ نکی قیادت کے لئے خیرسگالی کے جذبات کا اظہارکرتے ہوئے کہاکہ

نوازشریف کے دور حکومت میں سی پیک پر جس تیزی ، توجہ اور جذبے سے عمل درآمد ہوا وہ قابل تحسین اور قابل اطمنان تھا۔ چین اس جذبے کی قدر کرتا ہے۔ انہوں نے مسلم لیگ (ن) کے وفد کو چین کے دورے کی دعوت دی اور کہاکہ پارلیمانی اور سیاسی سطح پر رابطوں سے دونوں ممالک کی دوستی میں مزید قربت پیدا ہوگی اور باہمی تعاون کے نئے امکانات پیدا ہوں گے۔ اجلاس میں پاکستان اور چین کے درمیان ثقافت، علم وادب اور فنون لطیفہ کے شعبہ جات میں باہمی تبادلوں کے حوالے سے بھی اتفاق کیاگیا تاکہ عوام کی سطح پر دوطرفہ روابط میں مزید قربت لائی جاسکے۔ ملاقات میں طے پایا کہ دونوں جماعتوں کی سطح پر بھی روابط کو بڑھایاجائے گا اور نوجوانوں کے وفود کے تبادلوں کی حوصلہ افزائی کی جائے گی اور ایسے امکانات پر کام کیاجائے گا جس سے پاکستانی نوجوانوں کو ہنر مند بنانے کے مواقع میسر آئیں۔اجلاس میں کمیونسٹ پارٹی اور مسلم لیگ (ن) کے مابین مختلف فورمز پر امکانات کو وسعت دینے کے لئے مختلف تجاویز کے تبادلے پر بھی اتفاق کیاگیا۔

موضوعات:مسلم لیگ (ن)کے رہنماؤں سے ملاقات