لاہور( نیوزڈیسک ) پنجاب اسمبلی میں قائد حزب اختلاف حمزہ شہباز شریف سے پیپلزپارٹی پنجاب کے پارلیمانی لیڈر سید حسن مرتضیٰ کی قیادت میں وفد نے ان کے چیمبر میں ملاقات کی ۔اس موقع پر دونوں جماعتوں کے اراکین اسمبلی بھی موجود تھے ۔ حمزہ شہباز شریف نے سینیٹ کے انتخاب میں مسلم لیگ (ن) کے امیدوار کی حمایت پر پیپلزپارٹی کا شکریہ ادا کیا ۔ اس موقع پر دونوں رہنمائوں نے عوامی مسائل پر ایوان کے اندر مشترکہ حکمت عملی
اپنانے کے عزم کا اعادہ بھی کیا ۔ علاوہ ازیں مسلم لیگ (ن) کے رہنمائوں چوہدری عامر صدیق اور میاں عثمان نے ماڈل ٹائون میں حمزہ شہبازسے ملاقات کرکے حلقہ این اے 124کی انتخابی مہم کے حوالے سے تبادلہ خیال کیا اور آئندہ کے حوالے سے رہنمائی حاصل کی۔ حمزہ شہباز نے شاہد خاقان کی بھرپور انتخابی مہم چلانے اور مصری شاہ لو ہا مارکیٹ میں کامیاب جلسے کے انعقاد پر چوہدری عامر صدیق اور میاں عثمان کی کارکردگی کو سراہا۔
