جرمن چانسلر کا وزیر اعظم عمران خان کو ٹیلیفون ٗعہدہ سنبھالنے پر مبارکباد ،بڑی پیشکش عمران خان نے شکریہ کے ساتھ قبول کرلی اسلام آباد (این این آئی)وزیر اعظم عمران خان کو جرمنی کی چانسلر انجیلا مرکل نے ٹیلی فون کر کے انہیں وزارت عظمیٰ کا منصب سنبھالنے پر مبارکباد دی۔
پیر کو اپنے ٹیلیفونک رابطہ میں جرمن چانسلر انجیلا مرکل نے مختلف شعبوں میں تعاون کو وسعت دینے کے ساتھ ساتھ علاقائی و عالمی سطحوں پر باہمی مفاد کے امور پر مل کر کام کرنے کی خواہش کا اظہار کیا ٗ جرمن چانسلر نے وزیراعظم کو جرمنی کے دورے کی دعوت بھی دی جو انہوں نے قبول کر لی۔ اس موقع پر وزیر اعظم عمران خان نے جرمن چانسلر کا شکریہ ادا کیا۔ انہوں نے جرمنی کے ساتھ دوطرفہ تعلقات کو باہمی مفاد میں وسیع البنیاد اور طویل مدتی شراکت داری میں تبدیل کرنے کی خواہش کا اظہار کیا۔ انہوں نے کہا کہ یورپ میں جرمنی پاکستان کا سب سے بڑا تجارتی شراکت دار ہے اور دونوں ممالک کے درمیان توانائی اور آٹوموبائل سیکٹر میں تعاون اور پن بجلی کی پیداوار کے شعبے میں سرمایہ کاری کی بڑی صلاحیت موجود ہے۔ وزیر اعظم عمران خان نے جرمن چانسلر کو علاقائی صورتحال بالخصوص افغانستان کے مسئلہ کے پرامن حل اور بھارت کے ساتھ مزاکرات کے بارے میں آگاہ کیا۔ انہوں نے بھارت کے ساتھ تمام تصفیہ طلب مسائل کے حل کے لئے جامع مذاکرات کی بحالی کی ضرورت پر زور دیا۔
