پشاور (مانیٹرنگ ڈیسک) پیدائشی طور پر گونگی اور بہری معصوم بچی کے علاج کے لیے اس کی والدہ نے وزیراعظم عمران خان سے اپیل کی ہے کہ گزشتہ حکومت میں جاری رہنے والے علاج کو دوبارہ شروع کیا جائے۔ ایک نجی ٹی وی چینل کی رپورٹ کے مطابق اس تین سالہ بچی پریسا کا اس کے والدین نے ابتدائی طور پر علاج کروایا مگر اس کے مکمل علاج کے لیے پندرہ لاکھ روپے کی ضرورت ہے جو یہ برداشت نہ کر سکے، واضح رہے کہ اس بچی کی خبر سوشل میڈیا کے ذریعے سابق وزیراعظم تک پہنچی
جس پر بچی کا علاج شروع کر دیا گیا لیکن نئی حکومت آنے سے علاج کا سلسلہ رک گیا ہے۔ بچی کے والد نے کہا کہ عمران خان کی حکومت میں بچی کے علا ج کا سلسلہ منقطع ہوگیا ہے، علاج پر 15لاکھ روپے خرچ آتا ہے جو میں برداشت نہیں کرسکتا، بچی کے والد نے وزیراعظم عمران خان سے اپیل کرتے ہوئے کہا کہ وہ میری بچی پریسا کا علاج جاری رکھنے کی ہدایات دیں۔ میڈیا سے گفتگو کرتے ہوئے بچی کے والد نے کہا کہ آپریشن کے ذریعے مشین لگ جائے گی تو یہ بھی بول اور سن سکے گی۔
