اسلام آباد (مانیٹرنگ ڈیسک )چیف جسٹس ہماری جائیداد پر ناجائز قبضہ ختم کرادیں ،ساری رقم  دینے کو تیارہوں۔ سیالکوٹ کے رہائشی نے وڈیو بیان کے ذریعے پیشکش کر دی۔تفصیلات کے مطابق سوشل میڈیا پر ایک ویڈیو تیزی سے وائرل ہو رہی ہے جس میں ان کاغذات کو دیکھا جا سکتا ہے جو کہ ان کے والد نے 23 سال تک کیس لڑتے لڑتے جمع کئے۔ غلام رضا مرحوم کی سیالکوٹ کینٹ میں جائیداد جس کی مالیت آج اربوں روپے ہے پر مقامی سیاسی خاندان نے 29 سال سے ناجائز قبضہ کر رکھا ہے۔ والد  کی

موت کے بعد دلبرداشتہ عامر رضا  اٹھارہ برس سے کینیڈا میں مقیم ہیں۔عامر رضا کا کہنا ہے کہ اگر سپریم کورٹ ان کو انصاف کی یقین دہانی کرائے تو وہ ساری جائیداد سے حاصل ہونے والی آمدنی کو پاکستان میں حکومت کے ڈیم فنڈ اور دیگر فلاحی پروگراموں کیلئے بطورعطیہ دے دیں گے۔ذرائع کے مطابق اس جائیداد کی کل مالیت 3 ارب روپے ہے۔واضح رہے عامر رضا حسین کے والد اپنی موت کے تین دن پہلے تک عدالتوں میں دھکے کھاتے رہے اور بالاخر شدید ذہنی دبائو کے باعث دل کا دورہ پڑنے سے جاں بحق ہو گئے تھے۔