اسلام آباد (این این آئی) پاکستان مسلم لیگ (ن) کے قائد سابق وزیراعظم نوازشریف، مریم نواز اور کیپٹن (ر)صفدر کو اڈیالہ جیل میں سزامعطلی کے حوالے سے آگاہ کر دیا گیاجس پر تینوں نے اللہ کا شکر ادا کیا۔بدھ کو اسلام آباد ہائیکورٹ نے ایون فیلڈ ریفرنس میں سابق وزیراعظم نوازشریف، مریم نواز اور کیپٹن صفدرکی سزائیں معطل کردی ہیں۔

اس حوالے سے جب سابق وزیر اعظم نوازشریف، ان کی صاحبزادی مریم نواز اور کیپٹن صفدر کو اڈیالہ جیل میں آگاہ کیا گیا تو تینوں نے اللہ کا شکر ادا کیا۔دریں اثنا پاکستان مسلم لیگ (ن)کے رہنما اورسابق گور نر سندھ محمد زبیر نے کہا ہے کہ شریف خاندا ن کی رہائی کاسو فیصدیقین تھا ،عدالت کا احترام کرتے ہیں اور صحیح فیصلہ ہوا ہے جس پر اللہ کا شکر ادا کرتے ہیں۔سابق وزیراعظم نواز شریف ، مریم نواز اور کیپٹن صفدر کی رہائی سے متعلق اپنے ایک بیان میں مسلم لیگ (ن)کے رہنما محمد زبیر نے کہاکہ تاخیر سے ہی سہی لیکن فیصلہ ہمارے حق میں آیا،تمام کورٹس میں کہا گیا کہ پاکستان میں بچے عمومی طور پر ماں باپ پر ہی انحصار کرتے ہیں اس حوالے سے ہمارا کیس مضبوط تھا اگر میاں صاحب ہی قصور وار نہیں تو ان کی صاحبزادی اور ان کے داماد کیسے قصور وار ہو سکتے ہیں۔ان کا کہنا تھا کہ ہمیں 100فیصد اسی فیصلے کی امید تھی ،کیس میں کچھ دم خم تھا ہی نہیں۔ نجی ٹی وی کے مطابق انہوں نے کہاکہ اطہر من اللہ بہت زبردست جج ہیں،اطہر وہ جج ہیں جوافتخار چودھر ی کے ترجمان تھے، عدالت کا احترام کرتے ہیں اور آج صحیح فیصلہ ہوا ہے جس پر اللہ کا شکر ادا کرتے ہیں۔