لاہور ( این این آئی)وزیراعلیٰ پنجاب سردار عثمان بزدار نے ریس کورس میں نماز عید کی ادائیگی کے بعد گھر واپسی پر اپنی ذاتی گاڑی اچانک جیل روڈ پر روک لی اور سڑک پر کھڑے ڈیوٹی کرنے والے پولیس اہلکاروں سے عید ملی۔ وزیراعلیٰ نے سڑک سے گزرنے والے لوگوں سے بھی عید ملی اور مبارکباد دی۔ وزیراعلیٰ گاڑی سے اتر کر ڈولفن فورس کے اہلکاروں ، پولیس جوانوں،
ٹریفک وارڈنز اور لوگوں میں گھل مل گئے اور انہیں سرکاری فرائض کی ادائیگی پر شاباش دی۔ وزیراعلیٰ پنجاب نے 4 مختلف مقامات پر گاڑی روکی۔وزیراعلیٰ پنجاب کو دیکھ کر اہلکاروں اور لوگوں نے خوشگوار حیرت کا اظہار کیا۔ اس موقع پر بچوں نے وزیراعلیٰ کے ساتھ سیلفیاں بنائیں۔وزیراعلیٰ نے اپنی کار خود ڈرائیو کی۔وزیراعلیٰ نے وزیراعلیٰ آفس کے عملے سے بھی عید ملی اور انہیں مبارکباد دی۔
