اسلام آباد(مانیٹرنگ ڈیسک)پسند کی وزارت نہ ملنے پر شیخ رشید عمران خان سے ناراض ہو گئے،عوامی مسلم لیگ کے سربراہ کو وزارت ریلوے دئیے جانے کا امکان ، ذرائع۔ تفصیلات کے مطابق عوامی مسلم لیگ کے سربراہ شیخ رشید احمد من پسند وزارت نہ ملنے پر عمران خان سے ناراض ہو گئے ہیں۔ قومی اخبار کی رپورٹ کے مطابق شیخ رشید نے وزارت داخلہ کی خواہش کا اظہار کیا تھا تاہم اس حوالے سے تحریک انصاف کی جانب سے پنڈی بوائے کو کسی قسم کی یقین دہانی نہیں کروائی گئی جبکہ تحریک انصاف کے مرکزی رہنما شفقت محمود بھی وزیر داخلہ
بننے کے خواہشمند ہیں۔ ذرائع کے مطابق شیخ رشید کو وزیر ریلوے بنائے جانے کا امکان ہے اور اس حوالے سے عمران خان اپنے دوست کو اعتماد میں بھی لینگے۔ واضح رہے کہ تحریک انصاف کی اعلیٰ قیادت کے اجلاس میں کابینہ کے ناموں پر غور کیا گیا ہے جبکہ چند اہم عہدوں پر نامزدگیاں بھی کر دی گئیں ہیں جن میں گورنر سندھ و پنجاب اور وزیراعلیٰ خیبرپختونخواہ کے علاوہ قومی اسمبلی کے سپیکر کیلئے نام سامنے آچکے ہیں۔ اسی اجلاس میں فیصلہ کیا گیا ہے کہ عمران خان کے قریبی ساتھی اور عوامی مسلم لیگ کے سربراہ شیخ رشید کو وزارت داخلہ کے بجائے وزارت ریلوے کا قلمدان دیا جائے گا اور اس حوالے سے عمران خان پنڈی بوائے سے خود بات کرینگے۔واضح رہے کہ تحریک انصاف مرکز، خیبرپختونخواہ اور پنجاب میں حکومت بنانے کا اعلان کر چکی ہے اور گزشتہ روز پندرویں قومی اسمبلی کے افتتاحی اجلاس سے نو منتخب اراکین حلف لے چکے ہیں جبکہ سندھ، خیبرپختونخواہ اور بلوچستان اسمبلی کے افتتاحی اجلاسوں میں بھی صوبائی اراکین اسمبلی حلف اٹھا چکے ہیں ۔ پنجاب اسمبلی کا اجلاس 15اگست کو بلایا گیا ہے جہاں نو منتخب اراکین حلف لیں گے ۔ قومی اسمبلی کا اجلاس 15اگست تک ملتوی کیا گیا ہے ۔ 15اگست کو قومی اسمبلی میں سپیکر اور ڈپٹی سپیکر کا چنائو ہو گا جبکہ قائد ایوان کیلئے ووٹنگ 17اگست کو ہو گی اور 18اگست کو متوقع طور پر وزیراعظم بننے کے بعد عمران خان ایوان صدر میں سادہ مگر پروقار تقریب میں صدر مملکت ممنون حسین سے حلف لینگے۔