اسلام آباد(آئی این پی) پاکستان تحریک انصاف کے مرکزی رہنما بابر اعوان نے کہا ہے کہ پی ٹی آئی کی حکومت،کابینہ اور وزیراعظم دوسری حکومتوں سے مختلف ہوں گے ، عمران خان وزراء کالونی میں رہیں گے اور پاکستان کے چیلنجز سے کیسے نمٹا جائے اس کیلئے مشاورت جاری ہے ،
اخراجات میں کمی عمران خان کی حکومت کا پہلا فوکس ہوگا، اقتدار کی منتقلی کے بعد حکومت کوئی وقت ضائع نہیں کرے گی ۔ وہ ہفتہ کو بنی گالہ کے باہر میڈیا سے گفتگو کر رہے تھے ۔ انہوں نے کہا کہ حکومت سازی کیلئے عمران خان میرٹ پر تعیناتیاں کریں گے ، پی ٹی آئی کی حکومت ،وزیراعظم ،کابینہ اور حلف برداری دوسری حکومتوں سے مختلف ہوگی ، عمران خان وزراء کالونی میں رہیں گے اور دیگر بڑے گھروں کے بارے میں وہ خود اعلان کریں گے ، حکومت سازی کے دوسرے پہلو میں سندھ میں اپوزیشن اور دوسری پارٹیوں کے مشورے کے ساتھ امیدوار کھڑے ہوں گے ، پاکستان کے چیلنجز سے کیا نمٹا جائے اس کیلئے مشاورت کی جا رہی ہے ،اس سلسلہ میں مشاورت شعبہ جات کے ماہرین سے کی جا رہی ہے ۔ بابر اعوان نے کہا کہ اخراجات میں کمی عمران خان کی حکومت کا پہلا فوکس ہوگا جس کے بارے میں وہ اپنے پہلے خطاب میں بتائیں گے ، اقتدارکی منتقلی کے بعد حکومت کوئی وقت ضائع نہیں کرے گی ، وقت ضائع کئے بغیر عملی اقدامات شروع ہو جائیں گے ، پاکستان معاشی اور عالمی سطح پر آگے بڑھے گا ، آنے والے دنوں میں پاکستانی میڈیا کا بہت اہم کردار ہوگا ، میڈیا کی ذمہ داری ہوگی کہ جن شعبوں میں فوری تبدیلی کی ضرورت وہ حکومت کو آگاہ کریں گے ۔انہوں نے کہا کہ ماضی میں کسی حکومت نے خرچے کم کرنے پر توجہ نہیں دی ، اداروں میں میرٹ پر بھرتیاں کریں گے ۔
