اسلام آباد (مانیٹرنگ ڈیسک)کپتان کی پرویز خٹک کو صدر بننے کی پیشکش، سابق وزیر اعلیٰ خیبرپختونخواہ وزیر داخلہ بننے کے خواہش مند، مولانا فضل الرحمن لوگوں کو کہتے پھر رہے ہیں کہ مجھے صدر بنوا دیں، ایک انکار کر رہا ہے تو دوسرا اس عہدے کے پیچھے بھاگ رہا ہے، معروف صحافی محمد مالک کا انکشاف۔ تفصیلات کے مطابق نجی ٹی وی پروگرام میں گفتگو کرتے ہوئے

معروف صحافی محمد مالک نے انکشاف کیا ہے کہ عمران خان نے پرویز خٹک کو صدر بننے کی پیش کش کی ہے تاہم سابق وزیراعلیٰ خیبرپختونخواہ نے انکار کرتے ہوئے وفاقی وزیر داخلہ بننے کی خواہش کا اظہار کر دیا ہےتاہم دوسری جانب فضل الرحمن لوگوں سے کہتے پھر رہے ہیں کہ مجھے صدر بنوا دو۔ ۔ محمد مالک کا کہنا تھا کہ ایک طرف ایک صدر بننے سے انکار کر رہا تو دوسرا اس عہدے کے پیچھے بھاگ رہا ہے۔ واضح رہے کہ کئی سالوں سے منسٹر انکلیو میں شاہانہ طرز رہائش رکھنے والے مولانا فضل الرحمن عام انتخابات 2018میں قومی اسمبلی کے رکن منتخب نہ ہو سکے اور انہیں دونوں نشستوں پر شکست ہوئی ہے جس کے بعد انہوں نے سرکاری طور پر منسٹر انکلیو میں ملنے والی رہائش گاہ خالی کر دی ہے اور اپنا ڈیرہ سینیٹر طلحہ محمود کے فارم ہاؤس میں جما لیاہے۔مولانا فضل الرحمن اپنی سیاسی سرگرمیاں بھی یہیں سے جاری رکھیں گے۔عام انتخابات کے نتائج سامنے آنے کے بعد یہ فضل الرحمن ہی تھے جنہوں نے فوری طور پر شدید ردعمل دیتے ہوئے انتخابات کو دھاندلی زدہ قرار دیتے ہوئے مسترد کر دیا تھا ۔ فضل الرحمن نے اسمبلی سے حلف لینے کے بھی امکان کو مسترد کر تے ہوئے کہا تھا کہ ان کی جماعت کے نو منتخب اراکین حلف نہیں اٹھائیں گے جس کے بعد اے پی سی میں بھی مولانا فضل الرحمن کا یہی مؤقف سامنے آیا تھا اور پیپلزپارٹی نے اس مؤقف کی حامی جماعتوں سے مذاکرات کے بعد انہیں اسمبلیوں سے حلف لینے کیلئے قائل کیا تھا۔