اسلام آباد(مانیٹرنگ دیسک)ہمارے بغیر عمران خان وزیراعظم نہیں بن سکتے، تحریک انصاف کے فردوس شمیم نقوی کے بیان پر متحدہ کا شدید ردعمل ، عمران خان اور پی ٹی آئی قیادت کو خبردار کردیا ۔تفصیلات کے مطابق تحریک انصاف کے فردوس شمیم نقوی کی جانب سے متحدہ سے اتحاد کو مجبوری اور اس پر لگائے گئے الزامات پر قائم رہنے کے بیان کے بعد متحدہ کی جانب سے

شدید ردعمل سامنے آیا ہے اور متحدہ کی قیادت نے تحریک انصاف کی قیادت سے فردوس شمیم نقوی کے خلاف کارروائی اور ان کے بیان کو پی ٹی آئی متحدہ کے اتحاد کیلئے خطرناک قرار دیا ہے۔ یم کیو ایم کے رہنما فیصل سبزواری نے فردوس شمیم نقوی کے بیان پر ردعمل دیتے ہوئے کہا کہ پیپلز پارٹی نے سندھ کو ہمیشہ مایوس کیا اس لیے ہم نے تحریک انصاف کے ساتھ اتحاد کیا، ہماری حمایت کے بغیر عمران خان وزیر اعظم نہیں بن سکتے، اگر یہی معاملات رہے تو ساتھ چلنے میں مشکلات پیدا ہوتی رہیں گی۔دوسری جانب مئیر کراچی وسیم اختر نے بھی کہا ہے کہ میرے خلاف بولنے والے اپنا سیاسی قد بڑھانے کے لیے مجھے نشانہ بناتے ہیں، فردوس شمیم اپنی قیادت سے بات کریں اور پوچھیں کہ ایم کیو ایم کتنی اہمیت رکھتی ہے، یہ بیانات صرف سستی شہرت کے لیے دئیے جا رہے ہیں۔خواجہ اظہار الحسن نے عمران خان اور جہانگیر ترین سے مطالبہ کیا کہ وہ فردوس شمیم نقوی کے بیان کا نوٹس لیتے ہوئے ان کے خلاف کارروائی کریں۔واضح رہے کہ جہانگیر ترین کی دعوت پر دو روز قبل ایم کیو ایم کے وفد نے بنی گالا میں عمران خان اور تحریک انصاف کی قیادت سے ملاقات کی تھی جس میں مذاکرات کے بعد ایم کیو ایم اور پی ٹی آئی کے درمیان حکومت سازی کیلئے مدد فراہم کرنے پر ایک فارمولہ طے پایا تھا اور ایم کیو ایم نے قومی اسمبلی میں قائدایوان کے انتخاب میں عمران خان کو ووٹ دینے کا اعلان کیا تھا جبکہ دوسری جانب پیپلزپارٹی نے بھی ایم کیو ایم کی جانب سے تحریک انصاف  کے ساتھ قومی اسمبلی میں اتحاد کی صورت میں متحدہ کیساتھ صوبائی اسمبلی میں اتحاد نہ ہونے کا کہا تھا۔

موضوعات:‘متحدہ تحریک انصاف فردوس شمیم نقوی