لاہور (این این آئی) تحریک انصاف کی جانب سے پنجاب میں حکومت بنانے کیلئے نمبرز پورے ہونے کے دعوؤں کے باوجود وزیر اعلیٰ کی نامزدگی نہ ہونے سے پارٹی کے اپنے لوگ تذبذب کا شکار ہو گئے ،وزیر اعلیٰ کے عہدے کیلئے حتمی نام سامنے نہ آنے کے باعث عہدے کیلئے امیدواروں کی فہرست بھی طویل ہو گئی ۔ ذرائع کے مطابق پارٹی کے دو بڑے رہنماؤں کے درمیان مبینہ طو رپر وزارت اعلیٰ کے نام پر رسہ کشی کی وجہ سے گزشتہ کئی روز سے پارٹی مشکلات کا شکار رہی تاہم اب عمران خان نے اس عہدے پر نامزدگی کا حتمی فیصلہ کرلیا ہے
جس کا باضابطہ اعلان آئندہ ایک دو روز میں کر دیا جائے گا۔ وزیر اعلیٰ کے عہدے کیلئے باضابطہ نامزدگی نہ ہونے کی وجہ سے قیاس آرائیاں جنم لے رہی ہیں جبکہ اس عہدے کیلئے خواہشمند امیدواروں کی فہرست طویل ہوتی جارہی ہے اور اب اس دوڑ میں سامنے آنے والے ناموں میں عبدالعلیم خان ، فوادچوہدری، سبطین خان ،یاسمین راشد ،یاسر ہمایوں سمیت دیگر کے نام شامل ہیں ۔پارٹی کے سنجیدہ رہنماؤں کا کہناہے کہ قیادت کو پنجاب کی وزارت اعلیٰ کے لئے بلا تاخیر نامزدگی کر دینی چاہیے تاکہ کارکنوں اور عوام کے سامنے صورتحال واضح ہو سکے۔
