ملتان(آئی این پی ) پاکستان تحریک انصاف کے وائس چیئرمین محمود قریشی نے کہا ہے کہ مسلم لیگ ن واضح طور پر دو حصوں میں تقسیم ہوچکی، امیدواران سمجھ چکے کہ شیر کا نشان زحمت ہے اس لیے وہ آزاد حیثیت سے الیکشن لڑ رہے ہیں، نوازشریف او ر شہباز شریف کے علیحدہ علیحدہ پالیسی بیان پارٹی میں دراڑ کی واضح عکاسی ہے ۔
ملتان میں راجن بخش گیلانی کی پی ٹی آئی میں شمولیت کے بعد میڈیا سے گفتگو کرتے ہوئے شاہ محمود قریشی نے کہا کہ ملک کا دینی طبقہ تحریک انصاف کا حامی ہے، علما کی حمایت سے ہی ہمارے نظریے اور سیاست کو تقویت ملی۔ مسلم لیگ ن کو صفائی پیش کرنے کا موقع ملا جسے انہوں نے ضائع کیا، آج ن لیگ کے قائد نوازشریف اور صدر شہباز شریف کے علیحدہ علیحدہ پالیسی بیان سامنے آرہے ہیں جو پارٹی میں دراڑ کی واضح عکاسی ہے۔ انہوں نے کہا مسلم لیگ ن میں پڑھنے والی دراڑ سے لوگوں میں مایوسی پیدا ہوئی جس کی وجہ سے انہوں نے جنوبی صوبہ محاذ تحریک بنائی، آج مسلم لیگ ن کو امیدواران نے پارٹی ٹکٹ واپس کردیے کیونکہ وہ یہ سمجھتے ہیں کہ شیر کا نشان ان کے لیے زحمت بنا چکا اس لیے وہ انتخابی میدان میں آزاد حیثیت سے کھڑے ہورہے ہیں۔شاہ محمود قریشی نے کہا کہ ملک کی دونوں بڑی جماعتیں ناکام ہوچکی یہی وجہ ہے کہ پیپلزپارٹی کے رہنما منظور وٹو جیسے سینئر سیاستدان نے بھی ٹکٹ نہیں تیر کا نشان نہیں لیا، ان کا بیٹا اور بیٹی بلے کے نشان پر الیکشن لڑ رہے ہیں ۔
