کراچی (نیوز ڈیسک)کراچی کو پانی کی فراہمی کا اہم ذریعہ حب ڈیم سوکھنے گا ٗڈیم سے تقریباً 9 کروڑ گیلن پانی کی یومیہ کمی نے شہر کے بیشتر علاقوں میں شہریوں کو بوند بوند کو ترسادیا ہے۔شہر قائد کے بیشتر حصے کو کینجھر جھیل سے ملنے والا پانی فراہم کیا جاتا ہے تاہم واٹر بورڈ انتظامیہ کی نااہلی نے پانی کی تقسیم کو ایک سنگین مسئلہ بنادیا ۔دوسری جانب  شہریوں کو پانی کی فراہمی کا متبادل انتظام بھی نہیں کیا جاسکا ٗایسے میں حب ڈیم بارشیں نہ ہونے

کی وجہ سے سوکھتا چلا جارہا ہے اور 24 ہزار ایکڑ سے زائد پر محیط  ڈیم میں پانی کی سطح ڈیڈ لیول کے قریب آگئی ہے۔  یومیہ 10 کروڑ گیلن پانی دینے والا ڈیم اب بمشکل ایک کروڑ گیلن پانی یومیہ دے رہا ہے۔واٹر بورڈ حکام کی جانب سے کراچی کے ضلع غربی کو پانی کی کسی دوسرے ذریعے سے فراہمی میں ناکامی نے صورتحال کو مزید سنگین بنادیا ہے اور حال یہ ہے کہ دفاتر سے غائب اور موقف دینے سے گریز کرنے والے واٹر بورڈ حکام کو اب صرف بارشوں کا انتظار ہے ۔