اسلام آباد(مانیٹرنگ ڈیسک) صوبہ خیبرپختونخوا کے شہر صوابی میں اسسٹنٹ کمشنر قیصر خان کی گاڑی دو موٹر سائیکلوں کو کچلتے ہوئے نکل گئی، دو سگے بھائیوں سمیت ایک ہی خاندان کے 4افراد جاں بحق، 1شدید زخمی، حالت تشویشناک۔ تفصیلات کے مطابق صوبہ خیبرپختونخوا کے شہر صوابی میں اسسٹنٹ کمشنر قیصر خان کی گاڑی نے دو موٹر سائیکلوںکو کچل ڈالا جس کے نتیجے میں دو سگے بھائیوں سمیت 4افراد جاں بحق ہو گئے ہیں ، حادثے میں ایک شخص شدید زخمی ہوا ہے
جو کہ ہسپتال میں زیر علاج ہے جس کی حالت تشویشناک بتائی جا رہی ہے۔پولیس کے مطابق اسسٹنٹ کمشنر قیصر خان اپنے گھر جا رہے تھے لیکن جونہی وہ منصبدار کے مقام پر پہنچے تو مخالف سمت سے آتی دو موٹر سائیکلوں پر ان کی گاڑی چڑھ دوڑی۔دوسری جانب اسسٹنٹ کمشنر قیصر خان نے حادثے کے حوالے سے بیان دیتے ہوئے کہا کہ ہے کہ حادثے کا شکار ہونے والی گاڑی ان کا بھائی چلا رہا تھا جبکہ وہ خود دوسری گاڑی میں سوار تھے اور حادثے میں ان کا بھائی بھی زخمی ہوا ہے۔
