اسلام آباد(مانیٹرنگ ڈیسک) الیکشن کمیشن نے مقررہ وقت میں حلقہ بندیوں پر 1286 اعتراضات نمٹاتے ہوئے حتمی فہرست شائع کردی ، الیکشن کمیشن نے اعتراضات پر4 اپریل سے روزانہ کی بنیاد پر ماسوائے اتوار اور یوم مئی کے مسلسل24روزتک سماعت کی،الیکشن کمیشن نے اسلام آباد ، کرک ، کو ہاٹ ، سوات ، صوابی ، نوشہرہ، بونیر، مٹیاری اور ٹھٹھہ کے تمام اعتراضات مسترد کر دیئے
جبکہ بعض اضلاع کے حلقہ جات کے نمبر تبدیل کرنے کا حکم دیا اور حتمی حلقہ بندی کی لسٹ میں ان حلقہ جات کے نمبر درست کئے گئے۔تفصیلات کے مطابق الیکشن کمیشن نے حلقہ بندیوں کی حتمی فہرست شائع کردی ہے ۔ الیکشن کمیشن نے حلقہ بندیوں کی ابتدائی اشاعت 5مارچ2018کو کی تھی جس کے بعد الیکشن کمیشن کے پاس قومی اور صوبائی اسمبلیوں کی حلقہ بندیوں پر کل 1286اعتراضات جمع ہوئے تھے جن میں سے خیبرپختونخوا سے 181،فاٹا سے 11،اسلام آباد سے 17،پنجاب سے 689، سندھ سے 284 اور بلوچستان سے 104اعتراضات دائر ہوئے تھے ۔ الیکشن کمیشن نے 4اپریل سے اعتراضات پر باقاعدہ سماعت شروع کی اور ماسوائے اتوار اور یوم مئی کے الیکشن کمیشن نے روزانہ کی بنیاد پر مسلسل24روز2مئی 2018تک اعتراضات کی سماعت کی ۔ الیکشن کمیشن نے مقررہ تاریخ کو حلقہ بندیوں کی حتمی اشاعت کردی ہے اور حلقہ بندیوں کی حتمی فہرست سرکاری گزٹ نوٹیفکیشن کیلئے پرنٹنگ کارپوریشن آف پاکستان پریس کو ارسال کردی گئی ہے ۔ یہ لسٹ الیکشن کمیشن کی سرکاری ویب سائٹ پر بھی دیکھی جا سکتی ہے ۔ الیکشن کمیشن آف پاکستان نے حلقہ بندیوں پر اسلام آباد ، کرک ، کو ہاٹ ، سوات ، صوابی ، نوشہرہ، بونیر، مٹیاری اور ٹھٹھہ کے تمام اعتراضات مسترد کر د یئے جبکہ بعض حلقہ جات کے نمبر تبدیل کرنے کا حکم دیا اور حتمی حلقہ بندی کی لسٹ میں ان حلقہ جات کے نمبر درست کئے گئے ہیں ۔
