لاہور (مانیٹرنگ ڈیسک) سابق صدر مملکت و پاکستان پیپلز پارٹی پارلیمنٹرین کے سربراہ آصف علی زرداری نے کہا ہے کہ سینیٹ الیکشن میں ضرورت تھی تو پی ٹی آئی سے اتحاد ہوگیا لہٰذا عام انتخابات کے بعد ضرورت پڑی تو عمران خان سے اتحاد ہو سکتا ہے، نواز شریف نے جمہوریت کو نقصان پہنچایا،ساری خلائی مخلوقیں میاں صاحب کے ساتھ چلتی رہی ہیں،سمجھتا ہوں الیکشن وقت پر ہوں گے اور ہونے بھی چاہئیں۔
ان خیالات کا اظہار انہوں نے پارٹی رہنما ثمینہ خالد گھرکی کی والدہ کے انتقال پر انکی رہائشگاہ جا کر اظہار تعزیت کے بعد میڈیا سے گفتگو کرتے ہوئے کیا ۔ اس موقع پر انہوں نے مرحومہ کی روح کے ایصال ثواب کے لئے فاتحہ خوانی بھی کی ۔ آصف زرداری نے کہا کہ جمہوریت ایک نظریہ ہے جو نواز شریف کو سمجھ نہیں آیا،پہلے بھی کہہ چکا ہوں کہ نواز شریف نے جمہوریت کو بہت نقصان پہنچایا،ہم جیل گئے کہ جمہوریت بنائیں، بینظیر بھٹو اور ذوالفقار علی بھٹو جمہوریت کو مضبوط کرنے کی خاطرشہید ہوئے لیکن نوازشریف نے شہزادہ سلیم بن کر ہماری جدوجہد اور جمہوریت ختم کردی، آج ہم کمزور جمہوریت لے کر چل رہے ہیں، اس کو کسی وقت بھی کچھ ہوسکتا ہے، اس سے بڑا ہمارے ساتھ کیا ظلم کیا جائے جو انہوں نے کردیا۔نوازشریف کے خلائی مخلوق سے متعلق بیان پر پوچھے گئے سوال پر انہوں نے کہا کہ خلائی مخلوق کے بارے میں پہلے میاں صاحب بتائیں کیوں کہ وہ نہ صرف ان کو استعمال کرتے رہے ہیں بلکہ ان کے خلائی مخلوق کے ساتھ قریبی تعلقات بھی رہے ہیں، 1988ء میں چھانگا مانگا، حمید گل سمیت دیگر اداکاروں کے ساتھ یہ رہے ہیں جبکہ اصغر خان کیس میں بھی ان کا اہم کردار ہے اور یہ ساری خلائی مخلوق ان کے ساتھ چلتی رہی ہیں۔عمران خان کے ساتھ اتحاد کے حوالے سے سوال کے جواب میں آصف زرداری نے کہا کہ ضرورت ایجاد کی ماں ہے، سینیٹ الیکشن میں ضرورت تھی تو پی ٹی آئی سے اتحاد ہوگیا لہٰذا عام انتخابات کے بعد بھی ضرورت پڑی تو عمران خان سے اتحاد ہو سکتا ہے ،
ہم اپوزیشن اور حکومت دونوں میں بیٹھنے کے لیے تیار ہیں، ہم نے پہلے بھی حکومت کی ہے، ہمیں وزیراعظم ہاؤس دیکھنے کی جلدی نہیں ،عمران خان نے نہیں دیکھا لہٰذا انہیں وزیراعظم ہاؤس دیکھنے کی جلدی ہے۔انہوں نے کہا کہ سمجھتا ہوں الیکشن وقت پر ہوں گے اور ہونے بھی چاہئیں البتہ گرمی اور رمضان ہیں لیکن ایسا پہلے بھی ہوتا رہا ہے۔ایک سوال کے جواب میں سابق صدر نے کہا کہ بلاول اور میری سیاست میں بالکل فرق ہوسکتا ہے، بلاول 29 سال اور میں 60 سال کا ہوں۔
