اسلام آباد(نیوز ڈیسک)حکومت کی ایمنسٹی سکیم ناکام ہوگئی ، بیرون ملک مقیم پاکستانیوں نے کالا دھن پاکستان لانے اور اسے سفید کرانے سے انکار کردیا۔ ایف بی آر کے پاس تاحال اندرون ملک کے علاوہ کسی بھی ملک سے کسی بھی پاکستانی شہری نے رابطہ نہیں کیا۔ ذرائع کے مطابق حکومت نے ایمنسٹی سکیم چند اربوں پتی پاکستانی جن کی بیرون ملک اربوں روپے کی غیر قانونی جائیدادیں ہیں
ان کو پاکستان منتقل اور ان کے کالے دھن کو سفید کرنے کیلئے متعارف کروائی ہے۔ ذرائع کا کہنا ہے کہ حکومت کی ایمنسٹی سکیم کے تحت اگر کوئی بھی بیرون ملک یا اندرون ملک سے پاکستانی ا پنا کالا دھن سفید کروانا چاہتا ہے تو اس پر نیب ، ایف آئی اے اور انکم ٹیکس قانون لاگو نہیں ہوگا اور اس سے اس رقم کے بارے میں انکوائری نہیں ہوگی۔ حکومت نے ایمنسٹی سکیم فنانس بل میں دیدی ہے لیکن اس بل کی منظوری تاحال نہ ہوسکی ہے ، قومی اسمبلی کی فنانس کمیٹی بل کی مخالفت کرتے ہوئے ایمنسٹی سکیم کیخلاف ووٹ دیا ہے جبکہ سینٹ کی قائمہ کمیٹی خزانہ نے بھی سکیم کی ترامیم کے ساتھ منظوری دی ہے۔ ذرائع کا کہنا ہے کہ اگر ایمنسٹی اسکیم کی پارلیمنٹ کی منظوری نہیں ہوتی تو کوئی بھی بیرون ملک یا اندرون ملک سے پاکستانی اس اسکیم پر اعتبار نہیں کرسکتا اور قانونی طور پر ایف آئی اے ، نیب اور انکم ٹیکس کے ادارے ایسی شخصیات کے خلاف کارروائی کرسکتے ہیں جبکہ بیرون ملک مقیم پاکستانیوں کی بڑی تعداد نے بھی اس ا سکیم کو نظر انداز کردیا ہے جس کی بڑی وجہ موجودہ حکومت پر بھروسہ نہ کرنا ہے۔ اس حوالے سے آن لائن نے ایف بی آر کے ترجمان ڈاکٹر اقبال سے متعدد بار رابطے کی کوشش کی لیکن انہوں نے کوئی جواب نہ دیا
