اسلام آباد (نیوز ڈیسک) ۔وفاقی حکومت نے مالی سال 2018-19ء کے بجٹ میں کم آمدنی رکھنے والے لوگوں کو مکانات کی تعمیر کے لیے سستے قرضوں کی فراہمی کے لیے پاکستان مورٹگیج ری فنانس کمپنی کے جاری کردہ سکوک بانڈز سمیت دیگر ڈیبٹ سیکیورٹیز کو 5 سال کے لیے انکم ٹیکس سے چھوٹ دے دی ہے جس کے لیے فنانس بل 2018 کے ذریعے انکم ٹیکس آرڈیننس 2001 میں 2 نئی شقیں شامل کی گئی ہیں۔ان ترامیم کے تحت عالمی بینک کے تعاون سے

سٹیٹ بینک آف پاکستان کی طرف سے قائم کردہ پاکستان مورٹگیج ری فنانس کمپنی(پی ایم آر سی)کی جانب سے ہاؤسنگ مورٹگیج مارکیٹ کو جاری کردہ سکوک بانڈز سمیت دیگر ڈیبٹ سیکیورٹیز سے حاصل کردہ منافع کی رقم کو 5 سال کے لیے انکم ٹیکس سے چھوٹ دینے کی تجویز دی گئی ہے۔اس کے علاوہ پاکستان مورٹگیج ری فنانس کمپنی کے جاری کردہ سکوک بانڈز سمیت دیگر ڈیبٹ سیکیورٹیز کی فروخت پرکیپٹل گین ٹیکس سے بھی 5 سال کے لیے چھوٹ کی تجویز دی گئی ہے۔