اسلام آباد (مانیٹرنگ ڈیسک)پاکستان الیکٹرانک میڈیا ریگولیٹری اتھارٹی(پیمرا) نے ڈان نیوز، چینل 24 اور بول نیوز کوعدلیہ مخالف تجزیوں اورپاک فوج کے خلاف نفرت انگیز نعرے نشرکرنے پراظہاروجوہ کے نوٹس جاری کر دئیے ۔جمعرات کو ترجمان پیمرا کے مطابق ڈان نیوز کو حالات حاضرہ کے پروگرام نیوز آئی میں میزبان مہر بخاری اور شرکاء کی جانب سے اعلیٰ عدلیہ کے

خلاف توہین آمیز تجزیہ کرنے پر اظہار وجوہ کا نوٹس جاری کیا۔چینل 24 کے پروگرام پوائنٹ آف دی ویو وِد ڈاکٹر دانش کے دوران سابق وزیراعظم میاں محمد نواز شریف کی عدلیہ مخالف تقاریر پر مبنی مواد چلانے پر اظہاروجوہ کا نوٹس جاری کرتے ہوئے تحریری جواب دائر کرنے کا حکم دیا گیا۔ اتھارٹی نے بول نیوز کو دو مختلف پروگراموں پراظہارِوجوہ کے نوٹس جاری کئے۔ پہلا اظہاروجوہ نوٹس حالات حاضرہ کے پروگرام ایسا نہیں چلے گا میں ریاست پاکستان مخالف اور پاک فوج کے خلاف نفرت انگیز نعرے نشر پر جاری کیا گیا جبکہ دوسرا اظہارِ وجوہ نوٹس اسی پروگرام کے دوران اینکرپرسن عامر لیاقت کے ایک شخص سے انٹرویو کے دوران اخلاق باختہ اور تضحیک آمیز تبصرے کو بغیر تدوین کے نشر کرنے پر جاری کیا گیا۔ تینوں چینلز کی انتظامیہ کو 2مئی کو تحریری جوابدہی کے ساتھ ذاتی شنوائی کیلئے حاضر ہونے کی ہدایت کی گئی ہے، مقررہ وقت میں جواب موصول نہ ہونے اور ذاتی شنوائی کیلئے پیش نہ ہونیکی صورت میں اتھارٹی ان چینلز کیخلاف پیمرا آرڈیننس 2002کی شق 27، 29 اور 30کے تحت یکطرفہ کارروائی کرنے کی مجاز ہوگی۔