اسلام آباد (مانیٹرنگ ڈیسک) پاکستان مسلم لیگ (ن) کے قائد سابق وزیراعظم میاں نواز شریف نے کہا ہے کہ ارکان قومی و صوبائی اسمبلی اور سینیٹرز کو کسی بھی صورتحال سے نمٹنے کیلئے تیار رہنے کی ہدایت کر تے ہوئے کہا کہ اگر میں جیل بھی چلا جاؤں تو کسی نے ہمت نہیں ہارنی ، مل کر پورے پاکستان کو کور کریں گے، راولپنڈی میں مخالفین کو ہر بار کی طرح شکست دیں گے، عوامی رابطہ مہم رمضان کے مہینے میں بھی جاری رہے گی،میں نے جو راستہ چنا ہے اس سے کسی طور پیچھے نہیں ہٹوں گا۔
جمعرات کو سابق وزیراعظم میاں نواز شریف کی زیر صدارت راولپنڈی کے ارکان قومی و صوبائی اسمبلی، سینیٹرز کا اجلاس ہوا۔ نواز شریف نے ارکان کو کسی بھی صورتحال سے نمٹنے کیلئے تیار رہنے کی ہدایت کر دی۔ نواز شریف نے کہا کہ اگر میں جیل بھی چلا جاؤں تو کسی نے ہمت نہیں ہارنی، ہم مل کر پورے پاکستان کو کور کریں گے، انہوں نے پارٹی رہنماؤں کو ہدایت دی کہ آئندہ عام انتخابات میں بھرپور انداز میں مہم چلائی جائے، پاکستان مسلم لیگ (ن) کا گراف گرا نہیں بلکہ مزید اوپر گیا ہے۔نواز شریف نے پارٹی رہنماؤں کو ہدایت کی کہ آپ عوام میں جائیں اور پارٹی کے بیانیہ کو عام آدمی تک پہنچائیں، انشاء اللہ راولپنڈی میں مخالفین کو ہر بار کی طرح شکست دیں گے، عوامی رابطہ مہم رمضان کے مہینے میں بھی جاری رہے گی۔ ذرائع کے مطابق جلسوں میں بھی نواز شریف، شہباز شریف اور مریم نواز الگ الگ نمائندگی کریں گے، نواز شریف نے پارٹی رہنماؤں اور کارکنوں کو پارٹی بیانیے ’’ووٹ کو عزت دو‘‘کی تحریک پر ڈٹ جانے کی ہدایت کی۔ سابق وزیراعظم نے کہا کہ میں نے جو راستہ چنا ہے اس سے کسی طور پیچھے نہیں ہٹوں گا۔
