اسلام آباد(مانیٹرنگ ڈیسک)تحریک انصاف کی جانب سے پارٹی میں چوہدری نثار کی شمولیت ، اہم پارٹی رہنمائوں اور عمران خان سے ملاقات کی تردید کر دی گئی۔ نجی ٹی وی ایکسپریس نیوز کی رپورٹ کے مطابق تحریک انصاف کے ترجمان کی جانب سے جاری بیان میں کہا گیا ہے کہ مسلم لیگ کے رہنما چوہدری نثار سے تحریک انصاف کی قیادت کی ملاقاتوں کے حوالے سے اطلاعات میں کوئی صداقت نہیں، چوہدری نثار سے ملاقات ہوئی نہ ان کی رہائش گاہ جانے کا ارادہ ہے، اس حوالے سے زیر گردش اطلاعات محض قیاس آرائیوں
پر مبنی ہیں۔بیان میں کہا گیا کہ چیئرمین تحریک انصاف عمران خان سارا دن راولپنڈی میں رکنیت سازی کیمپوں کے دورے میں مصروف رہے، راولپنڈی کا دورہ مکمل کرنے کے بعد چیئرمین اپنی رہائشگاہ چلے گئے، وائس چیئرمین شاہ محمود قریشی بھی ملتان میں موجود ہیں، ان سے بھی چوہدری نثار کی کوئی ملاقات نہیں ہوئی۔ ترجمان تحریک انصاف نے کہا کہ پی ٹی آئی رہنما جہانگیر ترین نے بھی چیئرمین تحریک انصاف کے ہمراہ راولپنڈی میں مصروف دن گزارا، غیر مصدقہ اور ناقص معلومات پر مبنی اطلاعات کے فروغ سےگریز کیا جانا چاہئے۔
