اسلام آباد /لاہور( این این آئی) قومی احتساب بیورو کے چیئرمین جسٹس (ر) جاوید اقبال نے اراکین قومی اسمبلی امیر مقام اور مولوی امیر زمان سمیت دیگر کیخلاف شکایات کی جانچ پڑتال کا حکم دیدیا ۔گزشتہ روز چیئرمین نیب جسٹس (ر) جاوید اقبال کی زیر صدارت نیب ہیڈ کوارٹرز میں اجلاس منعقد ہوا ۔ اجلاس میں اہم فیصلے کیے گئے۔ اجلاس میں رکن قومی اسمبلی امیر مقام کے خلاف آمدن سے زائد اثاثے بنانے کے مبینہ الزام میں شکایت کی جانچ پڑتال کا ڈی جی نیب خیبرپختونخواہ کو حکم دیا گیا ،

اجلاس میں رکن قومی اسمبلی مولوی امیر زمان کے خلاف سرکاری ترقیاتی فنڈز میں خورد برد اور آمدن سے زائد اثاثے بنانے کے مبینہ الزام میں شکایت کی جانچ پڑال کا ڈی جی نیب بلوچستان کو حکم دیا گیا ،اجلاس میں رکن صوبائی اسمبلی بلوچستان عبدالمالک کاکڑ کے خلاف ترقیاتی فنڈز میں خوردبرد کے مبینہ الزام میں شکایات کی جانچ پڑتال کا ڈی جی بلوچستان کو حکم دیا گیا ، اجلاس میں ڈسٹرکٹ ناظم پشاور محمد عاصم خان کے خلاف سرکاری فنڈز کا غیر قانونی استعمال اور قانونی تقاضے پورے کیے بغیر ملازمین میں اعزازیہ تقسیم کرنے کے مبینہ الزام میں شکایت کی جانچ پڑتال کا ڈی جی نیب خیبرپختونخواہ کو حکم دیا گیا ۔