اسلام آباد (نیوزڈیسک) احتساب عدالت نے سینیٹر اسحاق ڈار کیخلاف دائر آمدن سے زائد اثاثہ جات سے متعلق ضمنی ریفرنس میں شامل شریک ملزم کے ورانٹ گرفتاری جاری کرتے ہوئے سماعت (کل)5اپریل تک ملتوی کر دی ہے ۔منگل کو احتساب عدالت کے جج محمد بشیر نے سینیٹر اسحاق ڈار کیخلاف دائر آمدن سے زائد اثاثہ جات سے متعلق ضمنی ریفرنس کی سماعت کی ۔اس موقع پر اسلام آباد ہائیکورٹ بار کے صدر جاوید اکبر شاہ عدالت میں پیش ہوئے اور کہا کہ وہ ملزم منصور رضا کے وکیل ہیں اور

انہیں التواء چاہئے۔ جج محمد بشیر نے کہا کہ آپ آرام سے بات کریں اور اپنا وکالت نامہ دیں جس پر جاوید اکبر شاہ سیخ پا ہوگئے اور کہاآپ کیا مجھے گولی مار دیں گے یہ کہہ کر وہ اپنا وکالت نامہ پھینک کر چلے گئے۔ ۔عدالت نے ملزم منصور رضا رضوی کی طلبی کیلئے 3 بار آواز لگوائی لیکن ملزم پیش نہ ہواجس پر عدالت نے ملزم منصور رضا رضوی کے ناقابل ضمانت وارنٹ گرفتاری جاری کرتے ہوئے صدر اسلام آباد ہائیکورٹ بار جاویداکبر شاہ کو بھی تلخ کلامی کرنے پرشوکاز نوٹس جاری کردیا۔

موضوعات:اسحاق ڈار