اسلام آباد (مانیٹرنگ ڈیسک)ن لیگی رہنما نہال ہاشمی نے کہا ہے کہ انہوں نے سپریم کورٹ سے معافی نہیں مانگی بلکہ ان سے معافی منگوائی گئی تھی۔نجی ٹی وی نیوز کے اینکر پرسن منصور علی خان نے ن لیگی رہنما نہال ہاشمی کا انٹرویو کیا جسے آج رات اتوار کو نشر کیا جائے گا۔ اینکر پرسن منصور علی خان نے سوشل میڈیا کی ویب سائٹ پر پروگرام کا ایک چھوٹا سا ٹکڑا ٹوئیٹر پر شیئر کیا جس میں اینکر پرسن اورلیگی رہنما کے درمیان سخت مکالمہ ہوا ۔

انٹریو کے دوران نہال ہاشمی نے واضح الفاط میں کہا ہے کہ انہیں نشانہ بنایا جارہا ہے ۔ ان کا کہنا تھا کہ میں اس آدمی کو تلاش کر رہا ہوں جسے میرے پیچھے لگایا گیا ہے ۔ ایک اور سوال کے جواب میں نہال ہاشمی کا کہنا تھا کہ توہین عدالت از خودنوٹس کیس میں سپریم کورٹ میں معافی نہیں مانگی بلکہ ان سے معافی منگوائی گئی ہے ۔ یاد رہے کہ 28 مئی 2017 کو نہال ہاشمی کی طرف سے دھمکی آمیز گفتگو کی گئی تھی جس کا سپریم کورٹ نے نوٹس لے کر انہیں یکم جنوری 2018 کو ایک ماہ قید کی سزا سنادی تھی۔ یکم فروری کو جیل سے باہر آتے ہی نہال ہاشمی نے ایک بار پھر سپریم کورٹ کے ججز کو براہ راست گالیاں دیں جس پر چیف جسٹس نے دوبارہ نوٹس لے لیا تاہم اس بار نہال ہاشمی کی جانب سے مانگی جانے والی معافی کو قبول کرلیا گیا۔