اسلام آباد(مانیٹرنگ ڈیسک)مقبوضہ کشمیر میں بھارتی ریاستی دہشتگردی جاری، قابض بھارتی فوج نے 8کشمیری نوجوانوں کو شہید کر دیا۔ تفصیلات کے مطابق مقبوضہ کشمیر میں بھارتی مظالم کا سلسلہ جاری ہے اور بھارتی قابض فوج نے 8کشمیری نوجوانوں کو شہید کر دیا ہے۔ قابض فوج نے اسلام آباد(اننت ناگ)اور شوپیاں میں آپریشن کے دوران ان نوجوانوں کو شہید کیا۔ 7کشمیری نوجوانوں کو شوپیاں کے ایک گائوں میں شہید کیا گیا جبکہ ایک نوجوان کو اسلام آباد(اننت ناگ)کے علاقے دیالگام میں ریاستی دہشتگردی

کا نشانہ بناتے ہوئے شہید کیا گیا۔ بھارتی فوج نے کشمیری نوجوانوں کی شہادت پر روایتی بیان جاری کرتے ہوئے انہیں مجاہد قرار دیا۔ بھارتی پولیس نے اپنے ایک بیان میں شہید ہونےو الے کشمیری نوجوانوں کو حزب المجاہدین کا مسلح گوریلا قرار دیا۔ دوسری جانب بھارتی مظالم اور بے گناہ نوجوانوں کی شہادت کے خلاف کشمیری عوام کی بڑی تعداد سڑکوں پر نکل آئی اور شدید احتجاج کیا۔ کٹھ پتلی حکومت نے لوگوں کو احتجاج سے روکنے کے لیے اننت ناگ اور شوپیاں میں انٹرنیٹ اور ٹرین سروس معطل کردی۔