اسلام آباد (این این آئی) نیب راولپنڈی نے مضاربہ کیس میں اسلامی سرمایہ کاری کے نام پر عوام سے دھوکہ دہی اور بدعنوانی کے ذریعے اربوں روپے لوٹنے والے ملزم یاسر عزیز کو گرفتار کر لیا ہے۔ ہفتہ کو نیب کی طرف سے جاری بیان کے ملزم یاسر عزیز عوام سے سرمایہ کاری کے نام پر بڑے پیمانے پر دھوکہ دہی کے ذریعے لوٹنے میں ملوث رہا ہے۔ ملزم نے میسر الیگزر گروپ کے فنانس سیکرٹری کی حیثیت سے اپنے حقیقی بھائی ڈائریکٹر شاہد عزیز کی طرف سے جاری مضاربہ معاہدوں پردستخط کئے۔
اس پر الزام عائد کیا گیا تھا کہ اس نے اپنے بھائی کے ساتھ مل کر لوگوں سے بڑے پیمانے پر پیسے وصول کئے ہیں ۔ملزم یاسر عزیز نے مضاربہ کے ملزم شاہد عزیز کی ملکیتی املاک بھی فروخت کرنے کی کوشش کی۔ ڈی جی نیب راولپنڈی عرفان نعیم منگی نے کہا ہے کہ ملک کو بدعنوانی سے پاک کرنے کے خواب کو پورا کرنے کیلئے نیب چیئرمین جسٹس (ر) جاوید اقبال کی ولولہ انگیز قیادت میں بد عنوانی کے خاتمے میں سرگرم عمل ہے ۔ انہوں نے کہا کہ نیب ’احتساب سب کیلئے ‘کی انسداد بدعنوانی کی پالیسی پر سختی سے عمل پیرا ہے۔
