لاہور (نیوز ڈیسک) محکمہ صحت پنجاب اور ڈائریکٹوریٹ آف ڈرگز کنٹرول نے الرجی اور نزلہ زکام کے علاج کے لیے استعمال ہونے والی دوا Citraclor (Cetirizine Dihydrochloride 10mg) کے بعض بیچز کو غیر معیاری قرار دیتے ہوئے میڈیکل الرٹ جاری کردیا ہے۔

محکمہ صحت کے مطابق یہ کارروائی ڈرگ ٹیسٹنگ لیبارٹری پنجاب کی تجزیاتی رپورٹ سامنے آنے کے بعد کی گئی، جس میں دوا کے نمونوں میں عضویاتی ناپائیداری اور بعض آلائشوں کی موجودگی کی نشاندہی ہوئی۔ حکام کے مطابق مذکورہ اجزا انسانی صحت کے لیے نقصان دہ ثابت ہوسکتے ہیں۔

الرٹ کے تحت دوا کے مخصوص بیچز کی مارکیٹ میں فروخت فوری طور پر روکنے اور دستیاب اسٹاک واپس منگوانے کی ہدایات جاری کی گئی ہیں۔ یہ دوا میسرز آرسنز فارماسیوٹیکل انڈسٹریز، لاہور کی تیار کردہ ہے۔

غیر معیاری قرار دیے جانے والے بیچ نمبرز میں 38126، 37826، 37726، 38026 اور 37926 شامل ہیں، جبکہ ان تمام بیچز کی میعاد مارچ 2028 تک ہے۔

ڈرگز کنٹرول حکام نے میڈیکل اسٹورز، فارمیسیوں، اسپتالوں اور ہول سیلرز کو ہدایت کی ہے کہ مذکورہ بیچز کی خرید و فروخت فوری طور پر بند کردی جائے۔ اس کے ساتھ ساتھ متعلقہ اسٹاک کی تفصیلات بھی مقررہ ڈرگ انسپکٹر کو فراہم کرنے کا کہا گیا ہے۔

حکام نے شہریوں اور مریضوں کو بھی خبردار کیا ہے کہ وہ الرٹ میں درج بیچ نمبرز والی Citraclor کا استعمال فوری طور پر ترک کردیں۔ الرٹ کے مطابق غیر معیاری دوا کا استعمال صحت کے لیے نقصان دہ ہوسکتا ہے، اس لیے متاثرہ بیچز سے متعلق احتیاط برتنے کی ہدایت کی گئی ہے۔