اسلام آباد (این این آئی) پاکستان پیپلز پارٹی کے چیئرمین بلاول بھٹو زر داری نے کہا ہے کہ پاکستان کی فوج میری فوج ہے ٗکوئی وجہ نہیں بنتی کہ میں اپنی بہادر فوج پر تنقید کروں، پاکستان بھارت کے معاملات میں نہیں ٗ بھارت ریاستی سطح پر پاکستان کے معاملات میں ٹانگ اڑاتا ہے ٗ لوگوں کو مذہبی بنیادوں پر تقسیم کرکے الیکشن پر الیکشن جیتنا کامیابی نہیں ٗڈونلڈ ٹرمپ کی پاکستان سے متعلق ٹوئٹ میں اعداد و شمار غلط تھے۔
شہباز شریف اور عمران خان اپنے انداز میں سیاست کرتے ہیں مگر میں اپنی والدہ کی سیاست کو آگے بڑھائونگا۔ڈیوس میں پاکستان پیپلز پارٹی کے چیئرمین بلاول بھٹو زرداری نے بھارتی میڈیا کو ایک انٹرویو میں کرارا جواب دیتے ہوئے سرحد پار مودی جی کی مقبولیت پسند سیاست پر کھل کر تنقید کی۔بلاول بھٹو زر داری نے کہا کہ لوگوں کو مذہبی بنیادوں پر تقسیم کرکے الیکشن پر الیکشن جیتنا کامیابی نہیں، بھارت لاکھ چھپائے سوشل میڈیا کے ذریعے مقبوضہ کشمیر میں ہونے والا ظلم دنیا دیکھ رہی ہے۔سرحد پار سیاست کے حوالے سے بلاول بھٹو زر داری نے کہا کہ پاکستان میں یہ تاثر ہے کہ بھارت اپنے سکیولر تصور سے انتہاپسندی کی جانب بڑھ رہا ہے ٗ گجرات فسادات کے بعد مودی جی کی شخصیت کو پاکستان میں متنازع طور پر دیکھا جاتا ہے۔انہوں نے کہا کہ مودی جی کی پاکستان آمد پر لوگ پر امید تھے لیکن وہ صرف شادی کی تقریب میں شرکت کرکے چلے گئے۔بلاول بھٹو نے کہا کہ ڈونلڈ ٹرمپ کی پاکستان سے متعلق ٹوئٹ میں اعداد و شمار غلط تھے، پاکستان کو امریکہ کی جانب سے ملنے والا کوئیلشن فنڈ دہشت گردی سے جنگ میں ان خدمات کے لئے تھا جو پاکستان پہلے ہی لڑ چکا تھا ۔پاکستانی سیاست پر بات کرتے ہوئے پاکستان پیپلز پارٹی کے چیئرمین نے کہا کہ شہباز شریف اور عمران خان اپنے انداز میں سیاست کرتے ہیں مگر میں اپنی والدہ کی سیاست کو آگے بڑھائونگا۔
