اسلام آباد(مانیٹرنگ ڈیسک )بچی کو اغوا کے بعد زیادتی کی کوشش شہریوں نے ناکام بنا دی، فیصل آباد میں ملزم پکڑ کر پولیس کے حوالے کر دیا۔تفصیلات کے مطابق فیصل آباد کے علاقے ڈی ٹائپ میں ایک نوجوان جس کی شناخت وسیم کے نام سے ہوئی نے 5سالہ بچی حاجرہ کو بہلا پھسلا کر ایک مکان میں لے جاتے ہوئے علاقہ مکینوں نے دیکھ لیا اور اہل علاقہ کے ہمراہ موقع پر پہنچ کر ملزم کو پکڑ لیا۔ بچی سے پوچھ گچھ کے
دوران پتہ چلا کہ ملزم نے اسے اغوا کیا ہے جس پر شہریوں نے ملزم کی درگت بنا ڈالی اور بعد میں پولیس کے حوالے کر دیا۔ پولیس ملزم کو لے کر تھانے پہنچی تو مشتعل افراد نے تھانے کا گھیرائو کر لیا اور ملزم کو تھانے میں گھس کر تشدد کا نشانہ بنایا،ملزم کی جان کو خطرہ دیکھتے ہوئے پولیس نے اسے نامعلوم مقام پر منتقل کر دیا ہے۔ پولیس نے ملزم وسیم کے خلاف بچی اغوا اور زیادتی کی کوشش کا مقدمہ درج کر لیا ہے ۔
