لاہور(این این آئی) متحدہ مجلس عمل کی بحالی کے لئے پانچ بنیادی جماعتوں کا سربراہی اجلاس جمعیت علما پاکستان کی میزبانی میں آج بروز ( بدھ ) کو منعقد ہوگا۔ جس میں جے یو پی کے مرکزی صدر پیر اعجاز احمد ہاشمی ،جے یو آئی کے سربراہ مولانا فضل الرحمان،
اسلامی تحریک کے سربراہ علامہ ساجد علی نقوی، امیر جماعت اسلامی سراج الحق، امیرمرکزی جمعیت اہل حدیث پروفیسر ساجد میراور سٹیرنگ کمیٹی کے ارکان بھی شریک ہوں گے۔ ایم ایم اے کے بانی صدر علامہ شاہ احمد نورانی مرحوم کی کراچی رہائش گاہ پر منعقدہونے والے سربراہی اجلاس میں مذہبی جماعتی کے اتحاد کی بحالی کے حوالے سے غور و خوض کیا جائے گا۔ مختلف وفود سے گفتگو میں پیر اعجاز ہاشمی نے کہا کہ متحدہ مجلس عمل میں شمولیت کے حوالے سے جے یو پی کی مجلس شوریٰ اجازت دے چکی ہے۔ ہم پر امید ہیں کہ ایم ایم اے آئندہ انتخابات میں سیکولر جماعتوں کے مقابلے میں عوام کے پاس بہترین متبادل آپشن ہوگی۔ انہوں نے کہا کہ پاکستان کے عوام نظام مصطفی کا نفاذ چاہتے ہیں۔ جس کے لئے انتخابی عمل میں اسلامی قوتوں کو ووٹ ملنا ضروری ہیں۔ اس سے فرقہ وارانہ ہم آہنگی بھی پیداہوگی۔ان کا کہنا تھاکہ2002ء کے انتخابات میں عوام کی حمایت سے ایم ایم اے نے دو صوبوں میں حکومت قائم کی اور قومی اسمبلی میں قائد حزب اختلاف کا منصب سنبھال کر جمہوری عمل میں اپنا کردار ادا کیا۔ ایک سوال کے جواب میں پیر اعجاز ہاشمی نے کہا کہ متحدہ مجلس عمل میں بانی جماعتیں ہی ابتدائی طور پر شامل ہوں گی۔ تمام فیصلے اتفاق رائے سے ہوں گے۔ اسے دو جماعتی اتحاد نہیں بننے دیں گے۔
