واشنگٹن(سی پی پی)امریکہ میں تعینات پاکستانی سفیر اعزاز چوہدری نے امریکی سینیٹر کوری بوکر سے ملاقات کی جس میں پاکستانی سفیر نے امریکی سینیٹر کو پاک امریکہ تعلقات اور علاقائی صورتحال پر بریف کیا۔ اعزاز چوہدری نے کہاکہ پاکستان نے دہشتگردی کیخلاف کامیابیاں حاصل کی ہیں۔

افغانستان میں قیام میں امن کیلئے پاکستان اور امریکہ کا ساتھ ضروری ہے۔ انہوں نے کہا کہ دہشتگردی کے خاتمے سے پاکستان میں امن بحال ہوا اور ملکی معیشت بہتری کی طرف گامزن ہوئی۔ پاکستانی سفیر کا کہنا تھا کہ پاک امریکہ تعاون سے مختلف شعبوں میں روزگار کے مواقع پیدا ہوں گے۔ اعزاز چوہدری نے کہا کہ دہشت گردی کے خلاف پاکستان کی کامیابی سے اندرونی سکیورٹی صورتحال بہتر ہوئی، افغانستان میں سیاسی عمل کی کامیابی کیلئے مل کر کام کرنے کی ضرورت ہے۔ اس پر سینیٹر کوری بوکر نے کہا کہ علاقائی امن و استحکام کیلئے پاکستان و امریکا کو مل کر کام کرنا ہوگا۔ اس موقع پر امریکی سینیٹر کوری بوکر کا کہنا تھا کہ خطے میں امن و استحکام کیلئے پاکستان کا تعاون ضروری ہے۔ دریں اثناء پاکستانی سفیر اعزاز چوہدری نے پاکستان امریکن پریس ایسوسی ایشن کی تقریب سے خطاب کرتے ہوئے کہا کہ ہم مثبت ایجنڈے پر آگے بڑھ رہے ہیں، پاکستان امریکا سے باہمی احترام پر مبنی تعلقات کو فروغ دینا چاہتا ہے اور افغانستان میں امن پاکستان اور امریکا دونوں کے مفاد میں ہے۔