لاہور( این این آئی) حلقہ این اے120کے ضمنی انتخاب میں مسلم لیگ (ن) کی امیدوار بیگم کلثوم نواز کی کامیابی کے واضح آثار نظر آتے ہی پارٹی کے مرکزی رہنماؤں اور کارکنوں نے ماڈل ٹاؤن کا رخ کر لیا ،سکیورٹی انتظامات کیلئے پولیس کی بھاری نفری ماڈل ٹاؤن پہنچ گئی جبکہ وارڈنز کی اضافی نفری بھی تعینات کر دی گئی ۔
تفصیلات کے مطابق پولنگ کا وقت ختم ہونے اور ووٹوں کی گنتی کا عمل شروع ہونے کے بعد (ن) لیگ کی امیدوار بیگم کلثوم نواز اور پی ٹی آئی کی امیدوار ڈاکٹر یاسمین راشد نتائج میں ایک دوسرے سے آگے پیچھے جارہی تھیں اور مارجن بھی کم تھا تاہم 50پولنگ اسٹیشنز کے نتائج کے بعد بیگم کلثوم نواز کا پلڑا بھاری ہو گیا اور آخری وقت تک بیگم کلثوم نواز کی واضح برتری بر قرار رہی ۔ بیگم کلثوم نواز کی یقینی کامیابی کے آثار نظر آتے ہی رہنماؤں اور کارکنوں نے ماڈل ٹاؤن کا رخ کر لیا ۔ اس موقع پر رہنما او رکارکن مٹھائیوں کے ڈبے اور ٹوکرے لے کر پہنچے اور پیشگی ایک دوسرے کو مٹھائیاں کھلاتے رہے ۔حلقہ این اے120سے اپنی والدہ بیگم کلثوم نواز کی انتخابی مہم چلانے والی مریم نوازنے ماڈل ٹاؤن میں پارٹی رہنماؤں کے ہمراہ ٹی وی کے سامنے بیٹھ کر نتائج دیکھے ، والدہ کی کامیابی پر مریم نواز کی خوشی دیدنی تھی جس کا اظہار وہ تالیاں بجا کر کرتی رہیں، ساتھ موجود رہنما بھی نعرے لگا کر خوشی میں شامل ہوئے ۔ تفصیلات کے مطابق مریم نواز شریف دوپہر کے وقت جاتی امراء رائے ونڈسے ماڈل ٹاؤن پہنچیں اور پارٹی رہنماؤں کے ہمراہ بیٹھ کر نہ صرف پولنگ کے حوالے سے لمحہ بہ لمحہ آگاہی حاصل کرتی رہیں بلکہ ہدایات بھی جاری کرتی رہیں۔ پولنگ کا وقت ختم ہونے کے بعد مریم نواز نے پارٹی رہنماؤں سینیٹر پرویز رشید،وزیر مملکت برائے اطلاعات و نشریات مریم اورنگزیب ، وزیر نجکاری دانیال عزیز ، وزیر مملکت برائے داخلہ طلال چوہدری ، سینیٹر آصف کرمانی ، بلال یاسین ،خواجہ عمران نذیر،بیگم تہمینہ دولتانہ سمیت دیگر کے ہمراہ بیٹھ کر ٹی وی پر نتائج دیکھے اوراپنی والدہ کلثوم نواز کی واضح برتری دیکھ کر بھرپور خوشی کا اظہار کرتی رہیں۔
