لاہور (این این آئی )لاہور کے انتخابی معرکے کے سلسلے میں سرچ انجن گوگل نے بھی میپ کے ذریعے پولنگ اسٹیشنز کے نقشے جاری کردئیے ۔ تفصیلات کے مطابق حلقہ این اے 120میں ہونے والی ضمنی انتخاب کے سلسلہ میں میں عوام کی رہنمائی اور آسانی کے لیے اب عوام انٹرنیٹ سے بھی رہنمائی حاصل کرسکیں گے ۔حلقہ این اے 120میں مجموع طور پر220پولنگ اسٹیشنز کی تصویریں گوگل میپ پر جاری کی گئی ہیں۔
گوگل میپ پر تصاویرکے ساتھ ساتھ علاقے میں قائم پولنگ بوتھ کے نقشے بھی شامل ہیں۔ دریں اثنا ترجمان ایوان وزیراعلی نے کہاہے کہ مالی امداد کے چیکس کی تقسیم اور کھانا بھیجنے کی خبر میں قطعاًکوئی صداقت نہیں ۔ ترجمان نے بتایا کہ ایک روزنامہ میں شائع ہونے والی خبر اور نیوز چینل پر نشر ہونے والی خبر رپورٹر کی ذہنی اختراع ہے جس میں کوئی حقیقت نہیں ۔ ترجمان نے واضح طو رپر تردید کرتے ہوئے کہاکہ وزیراعلی ہاؤس سے این اے 120 میں باالخصوص امیدواروں کی طرف سے کاغذات نامزد گی داخل کرانے کے بعد کسی قسم کے چیک تقسیم نہیں کئے گئے اور لاہور میں الیکشن آفس میں بریانی بھجوانے کے الزام میں بھی کوئی حقیقت نہیں ۔ یہ الزام نہ صرف غلط ہے بلکہ اسے مضحکہ کہاجائے تو بے جانہ ہوگا ۔ انہو ں نے کہاکہ ایسی خبر صحافی اقدار کے منافی ہے ۔ ایوان وزیراعلی اس کی پر زور تردید کرتا ہے ۔ انہوں نے کہاکہ رپورٹر نے جس آفس کو وزیراعلی کا کیمپ آفس کہاہے وہ وزیراعلی کا کیمپ آفس ہی نہیں ہے ۔ خبر نگار کو خبر جاری کرتے ہوئے اعلی صحافتی اقدار کے مطابق متعلقہ حکام سے تصدیق کرنی چاہیے تھی اور ان کا موقف بھی شائع کرنا چاہیے تھے ۔
