اسلام آباد (مانیٹرنگ ڈیسک) ایک نجی ٹی وی پروگرام میں مسلم لیگ (ن) کے ایم پی اے انعام اللہ نیازی سے دلچسپ سوال، تفصیلات کے مطابق نجی ٹی وی چینل کے ایک پروگرام عمران خان کے کزن اور مسلم لیگ (ن) اور شریف برادران کے دیرینہ ساتھی ایم پی اے انعام اللہ نیازی نے شرکت کی۔ واضح رہے کہ انعام اللہ نیازی نے اپنی سیاست کی ابتدا مسلم لیگ (ن) سے کی اور میاں نواز شریف کے پہلے دور حکومت میں ممبر قومی اسمبلی ہونے کے علاوہ اہم عہدوں پر بھی فائز رہے۔
ان کا شمار میاں نواز شریف کے انتہائی معتمد ساتھیوں میں ہوتا تھا لیکن شریف برادران سے اختلافات کی بناء پر وہ مسلم لیگ (ن) چھوڑ کر تحریک انصاف میں شامل ہو گئے، مگر وہ تحریک انصاف میں بھی زیادہ عرصہ نہ گزار سکے، انہوں نے چند ماہ بعد دوبارہ مسلم لیگ (ن) میں دوبارہ شمولیت کر لی۔ نجی ٹی وی چینل کے میزبان واسع چوہدری نے انعام اللہ نیازی سے سوال کیا کہ نیازی صاحب اگر آپ کھلے سمندر میں کشتی میں سوار ہوں اور آپ کے سامنے دو افراد ڈوب رہے ہوں اور وہ افراد آصف زرداری اور عمران خان ہوں اور آپ کے پاس صرف ایک لائف جیکٹ ہو تو آپ کس کی جان بچانا پسند کریں گے اور یہ لائف جیکٹ کسے دیں گے؟ اس سوال کے جواب میں انعام اللہ نیازی نے سوچ بچار کے بغیر فوراً جواب دیا میں یہ لائف جیکٹ عمران خان کو ہی دوں گا۔ انعام اللہ نیازی کی یہ بات سن کر پروگرام کے ہوسٹ اور حاضرین نے حیرانی کا اظہار کیا۔ واسع چوہدری نے ان سے سوال کیا کہ سیاسی مخالفت کے باوجود آپ ایسا کیوں کریں گے؟ تو انعام اللہ نیازی نے جواب میں کہا کہ آصف علی زرداری جیسے چور سے میرا کیا لینا دینا، عمران خان سے سیاسی اختلاف سہی مگر وہ ایک لیڈر اور ایک بیش قیمت ہیرا ہے اور پھر وہ میرا اپنا خون بھی ہے۔ عمران خان کو میں اپنی آنکھوں کی سامنے موت کے منہ میں جاتا کیسے دیکھ سکتا ہوں۔
