اسلام آباد (مانیٹرنگ ڈیسک) تبلیغی جماعت کے امیر پر مبینہ پولیس تشدد کے بعد ہلاکت کیس میں ایس ایچ او، ایڈیشنل ایس ایچ او اور سپاہی کو معطل کر دیا گیا، تفصیلات کے مطابق ڈسٹرکٹ پولیس آفیسر ہری پور نے تبلیغی جماعت کے امیر عاشق خان پر مبینہ پولیس تشدد کے بعد ہلاکت کیس میں ایس ایچ او تھانہ کوٹ نجیب اللہ، ایڈیشنل ایس ایچ او اور سپاہی کو معطل کر دیا ہے۔
تبلیغی جماعت کے امیر عاشق خان جن کا تعلق کانگڑہ سے تھا پولیس حراست کے دوران جاں بحق ہو گئے، اس مقدمہ میں ملوث تھانہ کوٹ نجیب اللہ کے ایس ایچ او خان افسر سمیت ایڈیشنل ایس ایچ او اور سپاہی کو معطل کر دیا گیا ہے۔ ڈسٹرکٹ پولیس آفیسر سید ندیم شہزاد بخاری نے مرحوم کے گھر تعزیت کی اور دعائے مغفرت کے بعد منعقدہ جرگہ سے خطاب کرتے ہوئے انہوں نے کہا کہ تبلیغی جماعت کے امیر عاشق خان کے کیس میں میرٹ پر تفتیش کے بعد ملوث پائے گئے پولیس اہلکاروں کے خلاف قانونی کارروائی کی جائے گی۔ اس جرگہ میں علماء کرام، علاقہ کی سیاسی و سماجی شخصیات، پولیس افسران، منتخب بلدیاتی نمائندگان اور مقامی عمائدین کی بڑی تعداد شریک تھی۔ اس سے قبل سیاسی و سماجی شخصیت سابق ناظم ملک علی اصغر، الحاج عبدالمناف خان، نثار احمد، محمود خان ترین نے بھی خطاب کرتے ہوئے اپنے تحفظات کا اظہار کیا اور مظلوم خاندان کی داد رسی اور انصاف کی فراہمی کا مطالبہ کیا۔ ڈسٹرکٹ پولیس آفیسر نے کہا کہ مسلسل کام، معاشرتی دباؤ اور نوے فیصد منفی رویہ دیکھ کر بعض اوقات پولیس سے بھی کوتاہی ہو جاتی ہے مگر اس پر ہم نہ صرف کڑی سزائیں دے رہے ہیں بلکہ پولیس فورس کی تربیت بھی کی جا رہی ہے۔
