کراچی(این این آئی)پاکستان مسلم لیگ(ق) کے صدر چوہدری شجاعت حسین نے کہاہے کہ ملک کو مشکل میں ڈال دیا گیاہے ٗاگر مسلم لیگی دھڑے متحدہ نہیں ہوئے تو بہت نقصان ہوگا۔انہوں نے کہاکہ ماڈل ٹاؤن سانحہ انتہائی اہم کیس ہے جس میں 14 لوگوں کو قتل کیاگیاہے ۔ماڈل ٹاؤن سانحہ نے قدرتی سزا نواز شریف کو دے دی ہے۔پاکستان مسلم لیگ (ق) کے سربراہ چوہدری شجاعت بدھ کو دوروزہ دورے پر کراچی پہنچے ۔

مرکزی جنرل سیکرٹری طارق بشیر چیمہ بھی ان کے ہمراہ تھے ۔کراچی ایئرپورٹ پر میڈیا سے بات چیت میں چوہدری شجاعت نے کہاکہ سازشوں کی باتیں کرنے والوں کو اب بتادیناچاہئے کہ ان کے خلاف کونسی قوتیں سازشیں کررہی ہے ۔ملکی مفاد میں لیگی دھڑوں کو متحدہ کرنے نکلاہوں۔ سینئر اور نظریاتی لیگیوں کی بھی یہ خواہش ہے کہ ہم سب متحد ہوں لیکن کچھ لیگی ہمیشہ اس اتحاد میں رکاوٹ بنتے ہیں ۔موجودہ صورتحال میں ہمیں آگے آناہوگا۔انہوں نے کہاکہ ملک کو مشکل وقت میں ڈال دیاگیا ہے،موجودہ حالات میں ہمیں آگے آنا پڑا ہے اگر ہم موجودہ صورتحال میں آگے نہیں آئیں گے تو ملک مزید مشکلات میں پڑ جائے گا۔چوہدری شجاعت حسین نے کہاکہ ایم کیوایم سے ملاقات کا کوئی شیڈول نہیں جبکہ سابق صدرجنرل (ر) پرویزمشروف سے بھی کوئی رابطہ نہیں ہواہے۔سابق صدر آصف علی زرداری سے اتحاد کے حوالے سے متعلق سوال کے جواب میں انہوں نے کہاکہ اتحاد بنتے اور ٹوٹتے رہتے ہیں انتخابات جب ہوتے ہوئے دیکھائی دیں گے تو دیکھ لیں گے سانحہ ماڈل ٹاؤن کے حوالے سے پوچھے گئے سوال کے جواب میں انہوں نے کہاکہ ماڈل ٹاؤن سانحہ انتہائی اہم کیس ہے جس میں 14 لوگوں کو قتل کیاگیاہے ۔ماڈل ٹاؤن سانحہ نے قدرتی سزا نواز شریف کو دے دی ہے۔

موضوعات:چوہدری شجاعت حسین