لاہور( این این آئی) مسلم لیگ (ن) کے مرکزی رہنما حمزہ شہباز کی اہلیہ ہونے کی دعویدار عائشہ احد ملک نے وزیر قانون رانا ثنا اللہ خان کے خلاف مقدمے کے اندراج کیلئے تھانہ جنوبی چھاؤنی میں درخواست دیدی ۔ جس میں کہا گیا ہے کہ وزیر قانون رانا ثنا اللہ خان نے میڈیا سے گفتگو کرتے ہوئے نہ صرف ان کے خلاف الزام تراشی کی بلکہ ان پر تہمت لگائی ۔
درخواست میں رانا ثنا اللہ خان کے خلاف ضابطہ فوجداری کی دفعہ 509کے تحت مقدمہ درج کرنے کی استدعا کی گئی ہے ۔ یاد رہے کہ اس سے قبل عائشہ احد ملک وزیر قانون رانا ثنا اللہ خان کو اپنے وکیل کے توسط سے لیگل نوٹس بھی بھجوا چکی ہیں جس میں الزامات پر سات روز میں معافی مانگنے اوربصورت دیگر 20کروڑ ہرجانے کی کارروائی شروع کرنے کا کہا گیا ہے۔
