لاہور(نیوزڈیسک)عدالت نے وزیراعلیٰ پنجاب شہباز شریف کیخلاف پٹیشن مسترد کردی،اگر گزشتہ حکمرانوں سے شہباز شریف کی کارکردگی کا موازنہ کیا جائے تو ’شہباز شریف سب سے زیادہ اہل وزیراعلیٰ ہیں،اِن تاثرات کا اظہار ایڈیشنل سیشن جج نے اپنے فیصلے میں کیا ہے انہوں نے مزید کہا ہے کہ معاشرے کی فلاح کے لیے شہباز شریف

بہت بہترین کام کررہے ہیں، شہباز شریف کے خلاف بہت سے الزامات ہونگے مگر سابقہ وزرائے اعلیٰ سے بہترین کارکردگی کی بنا پر ایسے الزامات کو نظر انداز کرنا چاہیے۔فیصلے میں یہ بھی کہا گیا ہے کہ لوگ سستی شہرت حاصل کرنے کیلئے ایسے کیسز دائر کرتے رہتے ہیں۔یاد رہے کہ شہری اظہر عباس نے شہباز شریف پر یہ الزام عائد کیا تھا کہ اْنہوں نے عارفہ ٹاور میں منعقدہ تقریب میں اپنے خطاب میں کہا تھا کہ سیاست دانوں اور جرنیلوں نے 70 سال میں پاکستان کو برباد کر دیا ہے۔مذکورہ شہری نے مقدمے کے اندارج کے لیے سیشن عدالت سے رجوع کرتے ہوئے اپنی درخواست میں استدعا کی تھی کہ شہباز شریف کے خلاف ایماندار سیاست دانوں کی ساکھ متاثر کرنے پر غداری کا مقدمہ درج کیا جائے،جس پر ایڈیشنل سیشن جج رفاقت علی گوندل نے 15جون کو کیس کا فیصلہ محفوظ کیا تھا، جو آج سنا دیا گیا
عدالتی فیصلے سے قبل تھانہ ماڈل ٹاون پولیس نے اپنی رپورٹ عدالت میں جمع کرائی تھی، جس میں کہا گیا تھا کہ ایسا کوئی وقوعہ تھانے کی حدود میں نہیں ہوا۔مزید براں پولیس رپورٹ کے مطابق درخواست گزار نے جس جگہ کی نشاندہی کی ہے وہ ماڈل تھانے کی حدود میں نہیں آتی۔جس کی بنا پر پولیس نے درخواست کو بے بنیاد قرار دیتے ہوئے عدالت سے اسے خارج کرنے کی استدعا کی تھی۔