اسلام آباد(این این آئی)کلبھوشن کو سزائے موت سنائے جانے کے بعد بھارتی حکام نے دھوکے سے بلائے گئے تین بے گناہ پاکستانیوں کو رہا کرنے سے انکار کر دیا ہے۔لاہور کے علاقے باغبانپورہ کا 22 سالہ شہزاد 11 ماہ قبل ایک رشتہ دار کی شادی میں شرکت کیلئے نارووال گیا تھا ٗشہزاد اور اس کے 2 کزن 16 سالہ بابر اور 14 سالہ علی رضا سرحدی علاقے کی سیر کو نکل گئے تھے۔اس دوران تینوں نوجوانوں کو بھارتی سیکیورٹی فورسز کے اہلکاروں نے آواز دیکر اپنے پاس بلایا۔

دھوکے سے سرحد پار کرائی اور قید کر لیا۔ اہلخانہ نے مقامی پولیس اور رینجرز کو صورت حال سے آگاہ کر دیا ہے۔اہلخانہ کے مطابق حکومت کی کوششوں سے بھارتی حکام تینوں کو رہا کرنے پر رضا مند ہو گئے ٗتاہم کلبھوشن کی پھانسی کا معاملہ سامنے آیا تو عین وقت پر رہائی موخر کر دی۔تینوں نوجوانوں کے اہل خانہ نے حکومت اور انسانی حقوق کی تنظیموں سے اپیل کی ہے کہ ان کے بے گناہ بچوں کو بھارتی قید سے رہائی دلائی جائے۔