اسلام آباد(این این آئی)طیبہ تشدد کیس کے ملزم معطل جج راجہ خرم نے اسلام آباد ہائیکورٹ کی جانب سے فرد جرم عائد کرنے اورصلح نامے کومسترد کرنے کے خلاف انٹرا کورٹ اپیل دائرکردی ۔جمعرات کو طیبہ تشدد کیس کے مرکزی ملزم معطل جج راجہ خرم نے انٹراکورٹ اپیل میں صلح نامے مسترد کرنے اورفرد جرم عائد کرنے کے فیصلے کومعطل کرنے کی استدعا کی ۔عدالت نے اپیل کوسماعت کیلئے مقررکردیا ہے
ٗاپیل کی سماعت جسٹس عامر فاروق کی سربراہی میں 2رکنی بینچ کریگا۔اسلام آباد ہائیکورٹ نے دو روز قبل فیصلہ سناتے ہوئے طیبہ کے والدین اورملزمان کے درمیان صلح نامہ مسترد کرتے ہوئے معطل جج راجہ خرم علی اوران کی اہلیہ ماہین ظفرپرفرد جرم عائد کی تھی جبکہ ملزمان نے صحت جرم سے انکار کیا تھا۔اسلام آباد ہائیکورٹ نے کیس کے گواہان کو 19مئی کو طلب کیا ۔
