اسلام آباد(آئی این پی )الیکشن کمیشن اور نادرا کے درمیان آئندہ عام انتخابات کے سہل اور رکاوٹ کے بغیر انعقادکیلئے ٹی اوآرز طے پا گئے ، چیف الیکشن کمشنر جسٹس سردار رضا اور چیئرمین نادرا عثمان یوسف مبین کے درمیان ہونے والی ملاقات کے موقع پر دونوں اداروں کے درمیان ٹی اوآرز پر مبنی معاہدے پر باقاعدہ دستخط کر دیے گئے ، نادرا انہی ٹی اوآرز کے تحت2018کے عام انتخابات تک کمیشن کو اپنی سرسز اور معاونت فراہم کرے گا ۔

جمعہ کو چیئرمین نادرا نے چیف الیکشن کمشنر سے الیکشن کمیشن میں ملاقات کی جس میں ووٹرز فہرستوں میں اندراج کے حوالے سے معاملات پر تبادلہ خیال کیا گیا ۔ سردار محمد رضا نے الیکشن کمیشن کے لئے نادرا کی خدمات پر اطمینان کا اظہار کیا ۔ چیف الیکشن کمشنر نے انتخابی فہرستوں میں رجسٹرڈ مردوخواتین کے ووٹوں میں 12.17ووٹرز کے فرق کو اجاگر کرتے ہوئے چیئرمین نادرا پر زوردیا کہ وہ مردوخواتین ووٹرز کے اس فرق کو کم سے کم کرنے کیلئے خصوصی اقدامات اٹھائیں اور زیادہ سے زیادہ خواتین کے ووٹ رجسٹرڈ کر کے اس گیپ کو کم کرے۔چیئرمین نادرا نے چیف الیکشن کمشنر کو آگاہ کیا کہ نادرا خواتین کو زیادہ سے زیادہ شناختی کارڈ کے اجراء کیلئے خصوصی اقدامات کررہا ہے تاکہ اس گیپ کو کم کیا جا سکے ۔ اس موقع پر چیف الیکشن کمشنر نے نادرا کی طرف سے الیکشن کمیشن کو فراہم کی گئی سروسز پر اپنے اطمینان کا اظہار کیا۔ نادرا کی طرف سے الیکشن کمیشن کو فراہم کی گئی سروسز پر اپنے اطمینان کا اظہار کیا۔ قبل ازیں آئندہ انتخابات کے معمول کے مطابق انعقاد کیلئے نادرا اور الیکشن کمیشن کے درمیان طریقہ کار اور شرائط کے معاہدے پر دستخط کئے گئے جس کے تحت کسی مداخلت کے بغیر 2018کے انتخابات کے انعقاد تک نادرا اپنی سہولیات کمیشن کو فراہم کرے گا ۔