اسلام آباد(مانیٹرنگ ڈیسک)بھارتی اسٹیل ٹائیکون سجن جندال اور ان کے ساتھیوں کو پاکستان نے دس روز کا ویزہ جاری کیا تھا ، ویزا وزیراعظم ہاؤس اور دفتر خارجہ کی ہدایت پر جاری ہوا۔تفصیلات کے مطابق بھارت سے آنے والے اسٹیل ٹائیکون سجن جندال اور ان کے ساتھ
آنے والے دو افراد کو 10 دن کے لیے پاکستان میں بزنس کیٹگری میں ویزا جاری کیا گیا۔اے آر وائی نیوز کے مطابق ویزا 25 اپریل کو دہلی سے پاکستانی ہائی کمیشن سے جاری ہوا جو وزیراعظم ہاؤس اور دفتر خارجہ سے ہدایت ملنے پر جاری کیا گیا۔ بتایا جا رہا ہے کہ سجن جندال دیگر دو بھارتی شخصیات کو جاری کئے گئے ویزوں پر انہیں صرف اسلام آباد اور لاہور میں نقل و حمل کی اجازت تھی لیکن وہ خلاف قانون پنجاب کے سیاحتی مقام مری گئے اور کسی بھی سیکیورٹی ادارے نے انہیں گرفتار نہیں کیا نہ ہی پوچھ گچھ کی زحمت گوارا کی تاہم اطلاعات یہ بھی ہیں کہ تین رکنی بھارتی وفد کو جاری ہونے والا ویزہ پولیس رپورٹنگ فری تھا ،اس ویزے کے حامل افراد کسی بھی جگہ جانے سے قبل پولیس کو اطلاع کرنے کے پابند نہیں ہوتے جبکہ پاکستان اور بھارت میں زیادہ تر افراد کو ایک دوسرے کے ممالک میں جانے کیلئے جو ویزہ فراہم کیا جا تا ہے وہ پولیس رپورٹنگ ویزہ ہوتا ہے اور وہ ایک جگہ سے دوسری جگہ جانے سے قبل پولیس کو اطلاع دینے کے پابند ہوتے ہیں۔واضح رہے کہ بھارتی اسٹیل ٹائیکون سجن جندال سمیت تین بھارتیوںکا وفد خصوصی طیارے سے افغانستان کے دارالحکومت کابل سے اسلام آباد پہنچا تھا۔بھارتی وفد میں سجن جندال، سوکیت سنگال، وریندر ببرسنگھ شامل تھے۔
