اسلام آباد(آئی این پی ) عوامی مسلم لیگ کے سربراہ شیخ رشید احمد وزیر اعظم کے استعفے کے مطالبے پر اپوزیشن جماعتوں کا گرینڈ الائنس بنانے کیلئے سرگرم ہوگئے اور پاکستان تحریک انصاف کے احتجاج اور اسلام آباد جلسے میں شرکت کا اعلان کرتے ہوئے کہا ہے کہ(ن) لیگ کی طرف سے مٹھائیاں بانٹنے کی سمجھ نہیں آئی،پپو 2مضامین میں مکمل فیل ہے، 3میں سپلی ہے تو اسے پاس کیسے کہا جا سکتا ہے۔ وہ جمعہ کو پارلیمنٹ
ہاؤس کے باہر میڈیا سے گفتگو کر رہے تھے۔ انہوں نے کہا کہ وزیر اعظم کے خلاف اپوزیشن جماعتوں کیساتھ ملکر احتجاج کریں گے،ہم پارلیمنٹ میں بھی لڑیں گے اور سڑکوں پر بھی آئیں گے۔ انہوں نے کہا کہ سپریم کورٹ کے اگلے چیف جسٹس نے وزیراعظم کو ناہل کیا ہے، وزیر اعظم کے پاس عہدے پر رہنے کا کوئی اخلاقی جواز نہیں رہتا،وزیر اعظم کے استعفے کے مطالبے پر اپوزیشن جماعتوں کا گرینڈ الائنس بنائیں گے،
